Технологийн аварга компани саатлын шалтгаан болсон серверийн асуудлаа засах гэж хичээж байгаа энэ үед Outlook, Teams, Copilot зэрэг Microsoft-ийн үйлчилгээнүүдийн тасалдал АНУ-ын олон мянган хэрэглэгчдэд нөлөөлсний дараа Баасан гарагт (11-р сарын 13) Ази, Номхон далайн бүсийн ажлын цаг руу сунжран орж ирлээ. Энэ үеэр Монголын бөх, Японы их аварга, 68 дахь ёкодзүна Асашёорюү Дагвадорж Японд байж таарсан агаад "Microsoftやられた" буюу "Microsoft цохилтод өртлөө" хэмээн Х хуудсандаа жиргэсэн юм.

Уг саатал нь Австрали, Япон, АНУ-ын төрийн байгууллагууд болон OpenAI, Anthropic зэрэг компаниудад нөлөөлжээ. Энэ нь энэ онд Microsoft 365 үйлчилгээнд гарсан хоёр дахь томоохон тасалдал бөгөөд давтан гарч буй эдгээр доголдол нь байгууллагын үйлчлүүлэгчдийг Microsoft-ийн найдвартай байдалд эргэлзэхэд хүргэж болзошгүй гэсэн болгоомжлолыг төрүүлж байна.

Microsoft хамгийн сүүлийн мэдээлэлдээ, сааталд өртсөн серверүүдэд тохиргоо хийсэн боловч энэ нь тогтвортой сэргэлтэд хүргээгүй гэдгийг дурджээ. Тохиргоо хийсэн бүс нутгуудад хэсэгчилсэн сэргэлт ажиглагдаж байгааг тус компани мэдэгдэв.

Тус компани X хуудсандаа “Дэд бүтцийн ерөнхий тогтвортой байдлыг сайжруулахын тулд ямар нэмэлт арга хэмжээ авч болохыг бид судалж байна” хэмээн бичжээ.

Олон эх сурвалжаас мэдээлэл цуглуулж үйлчилгээний саатлыг хянадаг Downdetector сайтын мэдээлснээр, АНУ-ын зүүн эргийн цагаар 23:30 цагт (Сингапурын цагаар Баасан гарагийн 12:30 цаг) АНУ-д Outlook-тэй холбоотой 18,000 гаруй гомдол бүртгэгджээ. Мөн Баасан гарагийн өглөө орон нутгийн цагаар Энэтхэг, Австрали, Япон зэрэг Ази, Номхон далайн бүс нутагт Microsoft-ийн хэд хэдэн үйлчилгээ тасалдсаныг харуулсан байна.

Оргил үедээ буюу Пүрэв гарагийн АНУ-ын зүүн эргийн цагаар 13:00 цагийн орчимд Downdetector дээр АНУ-д Outlook-ийн асуудлын талаар 130,000 гаруй мэдээлэл бүртгэгдсэн бөгөөд саатал 12 цаг орчим үргэлжилжээ.

Үйлчилгээний хэвийн ажиллагааны мэдэгдэлдээ Microsoft компани Exchange Online болон цахим шуудангаас хамааралтай Microsoft 365 үйлчилгээний боломжууд сааталд өртсөн бол Exchange Online-аас хамааралгүй хэсгүүд хэвийн ажиллаж байгааг дурджээ. Exchange Online нь цахим шуудан, хуанли, харилцагчид болон даалгавруудыг хүргэдэг тус компанийн үүлэн технологид суурилсан харилцаа холбооны платформ юм. Түүнчлэн энэхүү саатлыг үүсгэсэн ямар нэгэн хорлон сүйтгэх үйл ажиллагаа "мэдэгдээгүй" байгааг компани нэмж хэлэв.

ЦАХИМ ШУУДАНГИЙН СИСТЕМД ҮЗҮҮЛСЭН НӨЛӨӨ

Австралийн Дотоод хэрэг, кибер аюулгүй байдлын сайд Тони Берк Microsoft компанийг үүнийг кибер халдлага биш гэж үзэж байгааг мэдэгдлээ.

Берк хэвлэлийн бага хурлын үеэр “Тэд үүнийг ямар нэгэн байдлаар CrowdStrike дээр харсантай төстэй буюу шинэчлэлт (update) буруу хийгдсэнээс болсон асуудал гэж үзэж байна” гээд “Тэдэнд тулгарч буй нөлөөлөл нь ... ихэвчлэн цахим шуудангийн системд тусаж байна” хэмээн нэмж хэлэв.

Баасан гарагийн сааталд өртсөн байгууллагуудын дунд Австралийн тагнуулын алба болон холбооны цагдаагийн газар багтжээ. 2024 оны CrowdStrike-ийн доголдол нь эмнэлэг, банк, нисэх онгоцны буудлуудын технологийн системийг саатуулсан интернэтийн хамгийн том тасалдлуудын нэг байсан бөгөөд дэлхийн харилцан уялдаатай технологийн эмзэг байдлыг тод харуулсан юм.

АНУ-ын Төлөөлөгчдийн танхим тус саатал хэрэглэгчдэд нь нөлөөлсөн бөгөөд инженерүүд нь Microsoft-той хамтран ажиллаж байгааг мэдэгдэв. Японы Засгийн газрын Хэрэг эрхлэх газрын дэд дарга Масанао Озаки сэтгүүлчдэд хандан уг саатал Засгийн газрын мэдээллийн системийн дэд бүтцэд нөлөөлж байгааг хэлжээ.

БИЗНЕСҮҮДЭД МЭДРЭГДСЭН НӨЛӨӨЛӨЛ

АНУ-ын хиймэл оюун ухааны компаниуд болох OpenAI болон Anthropic нь Microsoft-ийн холбогч системүүдтэй (connectors) холбоотой асуудалтай тулгарсан гэж мэдэгдсэн бол Энэтхэгийн агаарын тээврийн IndiGo болон Akasa Air компаниуд цахим шуудангийн дэмжлэг үзүүлэх үйлчилгээнд нь саатал гарсныг мэдээлэв.

Уг саатал нь мөн Тайванийн үнэт цаасны компаниуд, амьдралын даатгалын компаниуд болон хөрөнгө оруулалтын итгэлцлийн компаниудын сангийн удирдлагад хүндрэл учруулжээ. Эдгээр компаниудын нэг нь бүр өмнө нь төлөвлөсөн байсан бонд эргүүлэн худалдан авах гэрээний гүйлгээгээ цуцлахад хүрсэн тухай нөхцөл байдлыг сайн мэдэх эх сурвалж компанийн нэрийг нууцлан Reuters агентлагт ярьжээ.

Арилжааны eToro платформын зах зээлийн шинжээч Жош Гилберт хөрөнгө оруулагчид энэ саатлыг одоохондоо үл тоомсорлож магадгүй ч давтан гарах тасалдлууд цаг хугацааны явцад Microsoft-д хохирол учруулж болзошгүйг хэлэв.

Гилберт “Эдгээр харилцагчдын маш цөөхөн нь л бодит байдал дээр нэг шөнийн дотор Microsoft-ийн экосистемээс гарч чадах учраас хөрөнгө оруулагчид одоохондоо үүнийг тайван хүлээж авна гэж би бодож байна. Хамгийн том санаа зовоож буй зүйл бол энэ нь энэ онд гарсан анхны 365-ын саатал биш юм. Хэрэв найдвартай байдал нь байнга давтагддаг асуудал болж харагдаж эхэлбэл мэдээллийн технологийн хэлтэс бүр бизнесээ улам бүр нэг нийлүүлэгчийн гарт даатгахын өмнө хоёр дахин бодох шалтгаантай болно. Зах зээл үйлчлүүлэгчдээсээ Copilot дээр илүү их мөнгө зарцуулахыг хүсэхээсээ өмнө Microsoft-ийг 'гэрлээ асаалттай хэвээр байлгаж чадна' гэдгээ батлахыг харахыг хүснэ” гэжээ.

Microsoft энэ оны 1-р сард болон өнгөрсөн оны 10-р сард мөн 365 үйлчилгээний сааталтай тулгарч байсан юм. Мөн өнгөрсөн сард тус компани Azure үүлэн платформдоо саатал гарсныг мэдээлсэн нь бүтээмжийн программ хангамжийн багц болон дэлхий даяарх олон салбарт нөлөөлж байв.

Цахилгаан ачааны машин үйлдвэрлэгч Workhorse Group компани 11-р сарын 12-нд гуравдугаар улирлын тайлангаа танилцуулахаар төлөвлөж байсан ч дэлхий даяар гарсан Microsoft-ийн саатлын улмаас бизнесийн үйл ажиллагаа нь доголдсон тул 11-р сарын 16 хүртэл хойшлуулжээ.