Улсын Онцгой Комиссын 02 дугаартай тогтоолын хэрэгжилтийг хангах ажлын хүрээнд Монголын морин спорт, уяачдын холбооноос хурдан морин уралдаан зохион байгуулах бэлтгэл ажлууд хийгдэж байгаатай холбогдуулан тус холбооны Ерөнхий нарийн бичгийн дарга Ч.Хишигбаатар, ажлын албаны дарга Б.Батбаатар нартай  уулзаж санал солилцов.

Уулзалтаар шүлхий өвчний нөхцөл байдал, тэмцэх, сэргийлэх бодлого, хэрэгжүүлж буй арга  хэмжээний талаар ярилцаж хоёр талын хамтын ажиллагааны хүрээнд ойрын болон дунд хугацаанд хэрэгжүүлэх, шийдвэрлэх асуудлуудын талаар ярилцав. 

Мал, амьтны гоц халдварт шүлхий өвчний гаралт, тархалтыг таслан зогсоох, голомтыг хумих зорилгоор улс, аймаг, сумын түвшинд дархлаажуулалтын аяныг 4 дүгээр сарын 18-ны өдрөөс 5 дугаар сарын 09-ны өдрийг хүртэлх улсын хэмжээнд зохион байгуулж байна. 

Шүлхий өвчний эрсдэл өндөр байгаа одоогийн нөхцөлд хурдан морины уралдаан зохион байгуулах, хүн, малын бөөгнөрөл үүсгэх нь халдварыг нэмэгдүүлэх, дархлаажуулалтын арга хэмжээнд сөргөөр нөлөөлөх эрсдэлтэйг талууд хүлээн зөвшөөрч, морины уралдааныг 5 дугаар сарын 15-ноос хойш зохион байгуулах, мал эмнэлгийн болон мэргэжлийн байгууллагуудын зохион байгуулж байгаа үйл ажиллагааг дэмжих, хамтран ажиллах, салбар холбоодоороо дамжуулан уяачид, морь сонирхогчдод бодит мэдээллийг хүргэх, цахим уулзалт зохион байгуулах талаар нэгдсэн ойлголтод хүрч хамтран ажиллахаар боллоо.  

МАЛ ЭМНЭЛГИЙН ЕРӨНХИЙ ГАЗАР