"40 их наядаар тооцогдох нүүрсний хулгайн хэргийн эздийг ил болго" гэх шаардлагыг иргэд тавьж  арванхоёрдугаар сарын 4-ний буюу ням гарагаас эхлэн Төв талбайд жагсаж, өнөөдөр тав дахь өдрөө үргэлжилж байна. Жагсаж буй иргэдийн нэгэн төлөөлөл жүжигчин У.Цогтбаяр залуучуудтай нэгдэж, үзэл бодлоо Ерөнхий сайд Л.Оюун-Эрдэнэ болон албаны хүмүүст хүргээд байгаа билээ. Тэгвэл түүнийг өчигдөр тагнуулынхан дагаж, гэрийнхэн үүдэнд 2 машин сахисан талаар шууд дамжуулалтын үеэр мэдээллээ.

У.Цогтбаяр: “Урд шөнө тайван амарч чадсангүй манай гэрийн үүдэнд 2 машин шөнөжин сахилаа. Миний хамтрагч Жижгээ ахыг хүртэл хар хувцастай хүмүүс гэрийнх нь үүдэнд тагнасан байсан. Би яг яасан юм бэ?  Хүсвэл миний дансыг, манай гэрийг шалга! Би ямар ч хууль бус юм хийгээгүй.

100 хүний бүрэлдэхүүнтэй ажлын баг худлаа. Би хэрвээ энэ ажлын багт орох л юм бол  намайг Netflix дээр чиний цувралыг хийж өгье, намайг Hollywood-д гаргаж өгье гэж хуурах гэж л оролдоно. Би хэзээ ч зөвшилцөхгүй. Би маш их айж байна гэхдээ би зөв зүйлийн төлөө хэзээ ч шантрахгүй. 76 гишүүд нүүрсний хулгайтай холбоогүй гэдгээ баталж дансаа шалгуул чадахгүй бол бүгд уг үндсээрээ огцор” гэв.