2023 оны 50 дугаар 7 хоног буюу 12 дугаар сарын 11-нээс 17-ны өдрүүдэд Улсын хэмжээнд амбулаториор нийт 243.621 хүн үйлчлүүлснээс 22.440 тохиолдол буюу 9,2% нь ТТӨ-ий тохиолдол байгаа нь өмнөх долоо хоногтой харьцуулахад 2,1%-аар их харин өмнөх оны мөн үетэй харьцуулахад 0,5%-аар бага байна. 

Нийт түргэн тусламжийн дуудлагын 28,3 хувийг ТТӨ эзэлж байгаа нь өнгөрсөн 7 хоногоос 4,6%-аар өмнөх оны мөн үеэс 9,1%-аар тус тус нэмэгдсэн. 

Мөн ТТӨ-ий тархалтыг 5 түвшинд авч үздэг бөгөөд одоогийн байдлаар 2 дугаар түвшин буюу "Идэвхжилтийн түвшин"-д 8 аймаг, /Баянхонгор, Говьалтай, Дорнод, Орхон, Өвөрхангай, Сэлэнгэ, Увс, Хөвсгөл/ 3 дугаар түвшин буюу "Алаг цоог дэгдэлтийн түвшин"-д Улаанбаатар хот болон 9 аймаг /Архангай, Баян-Өлгий, Говьсүмбэр, Завхан, Дархан, Сүхбаатар, Ховд, Төв, Хэнтий/ байгаа бол 4 дүгээр түвшин буюу "Аймгийн хэмжээний дэгдэлтийн түвшин"-д 4 аймаг /Булган, Дорноговь, Дундговь, Өмнөговь/ шилжсэн. 

Үүсгэгчийн хувьд ХӨСҮТ-ийн лавлагаа лаборатори болон салбар 4 лабораторид нийт 251 сорьцод шинжилгээ хийхэд 16,7 хувьд нь амьсгалын замын синцитиал вирус, 15,1 хувьд нь томуугийн А хүрээний H3N2 вирус,  5,2 хувьд нь SARS-CoV 2 вирус, 6,8 хувьд нь амьсгалын замын халдварын бусад вирус илэрсэн байна. 

Томуугийн харуулдан тандалтын мэдээгээр 21 аймаг, 8 дүүргийн нэгдсэн эмнэлэг болон төрөлжсөн мэргэшлийн эмнэлгүүдэд нийт 9.020 хүн эмнэлэгт хэвтэн эмчлүүлж байгаагаас 2.818 буюу 31,2 хувь нь амьсгалын замын цочмог хүнд халдвартай байгаа нь өмнөх 7 хоногтой харьцуулахад 5,3 хувиар нэмэгдсэн. 

Насны хувьд 15 хүртэлх насны хүүхдүүдийн дунд ТТӨ өндөр буюу нийт ТТӨ-өөр өвчлөгсдийн 85,8 хувийг эзэлж байгаа бөгөөд үүнээс 56,1 хувийг нь 5 хүртэлх насны хүүхдүүдийн өвчлөл эзэлж байна. 

Энэ нь өмнөх 7 хоногтой харьцуулахад өвчлөл 10-аас 14 насанд 1,4 хувиар нэмэгдсэн байна.

2023 оны 12 дугаар сарын 22-ны өдрийн байдлаар нийслэлийн хэмжээнд 16 эмнэлгийн 2.263 орон дээр ТТӨ-ий шалтгаант өвчлөлийн улмаас хүүхдэд  тусламж үйлчилгээ үзүүлж байгаа ба орны ачаалал 114,4 хувьтай байна. Нэмэлтээр дэлгэсэн хүүхдийн орны тоо нийслэлд 1.213 орон нутагт 647 байна.