Дуучин Д.Отгонжаргалын ээж Т.Жүгдэртэй ярилцаа. 

-Охин тань төрийн өндөр цолоор энгэрээ мялаалаа. Ээжийнх нь хувьд та сэтгэгдлээ хуваалцаач?

-Миний охин ард түмнийхээ өмнө хийсэн хөдөлмөрөө үнэлүүлж, төрийн дээд шагнал авсанд эх хүний хувьд их баяртай байна. Хамгийн анхны дууг нь сонсоод сайхан сэтгэгдэл төрөөд уйлж л байсан. Ер нь дууг нь сонсоод гоё л сэтгэгдэл төрдөг. Одоо ч гэсэн охиныхоо дууг өдөрт 2-3 тавьж сонсоно. Янзын гоё шүү дээ. Заримдаа нулимс гарна.  

-Уран бүтээл, амьдралд нь та охиндоо хэрхэн зааж, зөвлөдөг вэ?

-Ард түмэндээ урлагаа сайхан хүргээрэй. Урлагтаа л сайхан, зөв зүтгээрэй гэж л захидаг. 

-Охиных нь дуулсан хамгийн хайртай дуу гэвэл та ямар дууг нь нэрлэх вэ?

-Олон сайхан дуутай. Тэр дундаас “Ижийдээ бичсэн захидал”, “Хун галуу”, Өвөр Монгол нэг дуу бий. Нэрийг нь мартчихаад байх юм. Түүнийг үргэлж сонсдог. Өдөртөө 2-3 удаа тавьж сонсдог.

-Анх дуучин болоход гэрийнхэн нь дэмжээгүй гэсэн. Та яаж хүлээж авч байв?

-Сүүлдээ дэмжсэн л дээ. Манай нэг авга ах дэмжээд, тэгээд дэмждэг болсон. Өөрөө урлагаар явна гээд өөр мэргэжил эзэмшихгүй гэсэн. Авга ах минь дэмжээд л түүнээс хойш бүгд дэмжсэн. Хоёр талын удамд дуулдаг хүмүүс байлаа. Миний аав их сайхан уртын дууч хүн байсан. 

-Шагнал авахаа хамгийн түрүүнд танд дуулгасан байх. Тухайн үед сонсоод ямар сэтгэгдэл төрж байв?

-Маш сайхан санагдсан. Ээж хүний хувьд сайхан л бодогдож байсан даа.