Баянгол дүүргийн 22-р хороонд зургаан иргэн угаартаж нас барсан. Тэдгээр иргэдийн хувийн мэдээлэл өчигдөр оройны 21 цагийн орчимд сошиал орчинд тархсан. Эдгээр дунд амь хохирогч О-г архины хамааралтай, амь хохирогчийн хүү О.Одбаярыг хулгайлах гэмт хэрэг үйлдэж байсан гэх хэт хувийн мэдээлэл нь байсан юм. Нас барсан иргэдийн хувийн мэдээлэлд ташаа зүйл орсон. Нас барсан иргэн О согтууруулах ундаа хэрэглээгүй байсныг Хууль зүйн сайд О.Алтангэрэл тодотгов.

Сэтгүүлчид Цагдаагийн байгууллага өөрөө мэдээлэл задруулсан байж болзошгүй талаар асуухад сайд О.Алтангэрэл:

• Гэмт хэргийн сангаас жирийн иргэн мэдээлэл авах боломжгүй.

• Халамжтай холбоотой фото зураг, мэдээлэл нь Цагдаагийн байгууллагад байхгүй.

• Хохирогчийн хувийн мэдээллийг олон нийтэд цацсан нь ёс зүйгүй бөгөөд хууль зөрчсөн үйлдэл.

• Ташаа мэдээлэл тарааж, хохирогчийг согтууруулах ундаа хэрэглэсэн мэтээр мэдээлсэн.

• Цагдаагийн байгууллагад хадгалагдах ёстой мэдээлэл алдагдсан.

Хариуцлага тооцох уу?

Сайд О.Алтангэрэл:

• Мэдээлэл задруулсан этгээдийг заавал олж, эрүүгийн хариуцлага хүлээлгэнэ.

• Хэрэв Цагдаагийн байгууллага мэдээлэл задруулсан нь тогтоогдвол, удирдлагад хариуцлага тооцно.

• Хувь хүний мэдээллийг хамгаалах нь удирдлагын үүрэг бөгөөд зөрчсөн тохиолдолд эрүүгийн хариуцлага хүлээх ёстой гэж мэдэгдлээ.