XVII Жарны “Үзэсгэлэн болгогч” хэмээх усан туулай жилийн зуны тэргүүн сарын шинийн 15, Нийтийн тооллын 2023.06.05-нд МБШТөв-Гандантэгчэнлин хийдийн Батцагаан дуганд тус хийдийн хувраг, Гандан телевизийн захирал Ж.Одгарьд ламтны санаачилгаар Б.Цолмон тэргүүтэй өглөгийн эзэд, буяны садан, нөхөд сэлтээс Бурхан Бүжинлхам бурхны зээгт наамал дүрийг бүтээн заллаа.
Уг Бүжинлхам бурхныг Х-р Богд Жэвзүндамба хутагтын өлмий бат, мэлмий тунгалаг, өнө удаан заларч, шашин амьтны тусыг агуу ихээр бүтээх,
Ачит богдын асрал ивээл, энэхүү нандин шүтээн бүтээсний үрд Монголын болоод Эх дэлхийн үрс бүхэн эрүүл энх бойжиж, насан хутгийг олох,
МБШТөв-Гандантэгчэнлин хийдээс Өндөр гэгээн Занабазарын үүсгэсэн Батцагаан цогчэн дуганаа дахин сэргээн өргөн олны сүжгийн далай арвидсан, шашны наран өнөд мандахад зориулан өргөжээ.
