Ганга нуурын хөвөөнөө 10 дугаар сарын 21-нд болох "Хунгийн баяр-2023" нэгдсэн үйл ажиллагааны үеэр Дарьганга хошууны зургаан сум тус бүр өөр өөрийн онцлогийг харуулсан зан үйлийн эд зүйл, үнэт өв болон үйлдвэрлэл эрхлэгчдийнхээ бүтээлээр үзэсгэлэн гаргахаар болжээ.
Гурав дахь удаагийн хунгийн баярыг Дарьганга ястны өв соёлыг сурталчилсан эвент чиглэлээр зохион байгуулахаар болсон. Энэ хүрээнд Дарьганга хошууны зургаан сумын иргэд, малчид, үйлдвэрлэл эрхлэгчид, ААНБ-ын төлөөллүүд оролцож, аялал жуулчлалыг хөгжүүлэх, нутгийн онцлогийг харуулсан ЖДҮ болон өрхийн үйлдвэрлэл чиглэлээр хийсэн бараа бүтээгдэхүүний үзэсгэлэн худалдааг анх удаа гаргана.
Улмаар шилдгийн шилдэг Дарьганга брэнд бүтээгдэхүүн болон гурван номинациар шилдгийг шалгаруулж урамшуулахаар болжээ.
Мөн энэ үеэр Дарьганга нүүдэл, бэр гуйх ёслол зэрэг зан үйл, урлагийн тоглолт, Хунгийн нүүдэл сургалт сурталчилгаа буюу хээрийн шувуу харах, тоолох аялал, шувуудын танилцуулга бүхий үзэсгэлэн, хос морьтон тэмцээн зохион байгуулахаар бэлтгэл ажлыг хангаж буй аж.
