ТАТАР МАЙДАР
Архаг стресс нь зөвхөн сэтгэл санааны асуудал биш, хүний биеийн эд эсийг дотроос нь "шатааж", цагаас нь өмнө хөгшрүүлдэг гол хүчин зүйл болохыг орчин үеийн анагаах ухаан анхааруулсаар байна. Тэгвэл энэхүү аюултай үйл явцыг зогсоож, залуу насыг уртасгах хамгийн хүчтэй, байгалийн зэвсэг нь бидний өдөр тутмын хүнсэнд байдаг Хан боргоцой болон Амтат гуа (Мелон) болохыг эрүүл мэндийн мэргэжилтнүүд онцоллоо.
Архаг стрессийн үед хүний биед исэлдэлтийн стресс үүсэж, арьсны коллаген задарч, үрчлээс тогтох үйл явц хурдасдаг. Тэгвэл хан боргоцойд агуулагддаг бромелайн фермент нь стрессийн даавар болох кортизолыг дарангуйлж, С аминдэмийн өндөр тусламжтайгаар арьсыг дотроос нь залуужуулдаг байна.
Үүнээс гадна амтат гуанд агуулагддаг Супероксид дисмутаза (SOD) хэмээх фермент нь шинжлэх ухаанд "эсийн гал унтраагч" гэж нэрлэгддэг хамгийн хүчтэй антиоксидант юм. Клиникийн судалгаагаар SOD ферментийг тогтмол хэрэглэхэд хүний мэдрэлийн ядаргаа, архаг стресс болон бие махбодийн туйлдалтыг үлэмж хэмжээгээр бууруулдаг нь тогтоогджээ.
Мэргэжилтний зөвлөгөө:
"Бид стрессийг амьдралаасаа бүрэн устгаж чадахгүй ч хоолны дэглэмээрээ дамжуулан эсийн түвшний гэмтлийг нөхөн сэргээх бүрэн боломжтой. Хан боргоцой, амтат гуа хоёрыг хамтад нь хэрэглэснээр тэдгээрийн найрлага дахь ферментүүд харилцан биенээ дэмжиж, стресс эсэргүүцэх чадварыг нэмэгдүүлэн, арьсны залуу төрхийг урт хугацаанд хадгалдаг" хэмээн хоол зүйчид тайлбарлаж байна.
Эдгээр жимсийг өдөр тутамдаа смүүти, шинэ салат хэлбэрээр хэрэглэх нь таныг стрессээс хамгаалаад зогсохгүй, урт насалж, залуу харагдахын үндэс болох юм.
"Стрессийн Эсрэг Алтан Смүүти" Жор
Энэхүү смүүти нь хан боргоцойн бромелайн болон амтат гуаны SOD (Супероксид дисмутаза) ферментийг биед хялбар шингэх хэлбэрээр нэгтгэсэн.
Орц (1 порц):
- Хан боргоцой: 1 аяга (шоо дөрвөлжин хэрчсэн) – Кортизолыг бууруулах, коллаген дэмжих үйлчилгээтэй.
- Амтат гуа (Мелон): 1 аяга (хэрчсэн) – Эсийн хөгшрөлтийг зогсоох SOD ферментийн эх үүсвэр.
- Ногоон цай (Хөргөсөн): 100 мл – Найрлага дахь L-теанин нь тархийг тайвшруулна.
- Чихэргүй тараг эсвэл бүйлсний сүү: 100 мл – Хоол боловсруулалтыг дэмжиж, ферментийн шимэгдэлтийг сайжруулна.
- Шинэ гаа (Mint): 3-4 навч – Сэнгэсэн амт оруулж, мэдрэлийг сэргээнэ.
Бэлтгэх заавар:
- Бүх орцыг блендэрт хийнэ. (Жимснүүдээ өмнө нь хөлдөөсөн бол илүү аятайхан хөөсөрнө).
- Бүх орцыг бүрэн уусч, жигд хөвсгөр масс болтол нь 45-60 секунд өндөр хурдаар блендердэнэ.
- Бэлэн болсон смүүтиг шилэн аяганд хийж, гааны навчаар чимэглээд шууд ууна
|
Эрүүл мэнд
