Netflix-ийн түүхэнд хамгийн их үзэлттэй бүтээлээр тодорч, 670 сая гаруй удаа үзэгдсэн “KPop Demon Hunters” анимэйшн киноны баатрууд дэлхий даяар амьд тоглолтоо хийхээр боллоо. “KPop Demon Hunters Golden World Tour” нэртэй уг аялан тоглолт 2027 оны зургаадугаар сарын 5-нд АНУ-ын Балтимор хотоос гараагаа эхэлнэ. 

Netflix-ээс Бямба гарагт мэдээлснээр, тус аялан тоглолт 2027 болон 2028 оны турш Хойд Америк, Европ, Ази-Номхон далай, Латин Америкийн 50 шахам хотод нийт 150 гаруй удаа тоглогдох аж. Одоогоор ирэх оны зургаагаас аравдугаар сар хүртэл Хойд Америк, Европт хийх эхний 61 тоглолтын товыг зарлаад байгаа бөгөөд бусад бүс нутгийн хуваарийг удахгүй танилцуулах юм байна. 

ТАЙЗНЫ ГАЙХАМШИГ БА ҮЗЭГЧДИЙН ОРОЛЦОО

Mastercard-ийн ивээн тэтгэж, Netflix болон AEG Presents хамтран бүтээж буй энэхүү шоу нь анимэйшн дүрслэл, тайзны орчин үеийн технологи, амьд акробат үзүүлбэр болон мэргэжлийн бүжигчдийг хослуулан киноны ер бусын ертөнцийг бодитоор амилуулах юм. 

• Гол дүрүүд: Үзэгчид шүтэн бишрэгчдээ ер бусын аюулаас хамгаалах нууц даалгавартай “Huntrix” охидын хамтлагийн гишүүд болох Руми, Мира, Зои нартай шууд харилцах боломжтой. Мөн өрсөлдөгч “Saja Boys” хамтлаг болон үзэгчдийн хайртай дүр болох Дерпи бар тайзнаа гарна. 

• Интерактив тоглолт: Тоглолтод ирсэн хүмүүс зүгээр нэг үзэгч бус, харин хамтдаа дуулж, бүжиглэн, “Huntrix” хамтлагт Хонмуныг битүүмжлэхэд нь туслах байдлаар түүхийн нэг хэсэг болж оролцоно. 

• Туршлагатай найруулагч: Шоуг Disney, Cirque du Soleil, Aerosmith, Пол Маккартни болон Мэрайя Кэри нарын амьд тоглолтуудыг найруулж байсан 25 жилийн туршлагатай Эми Тинкхэм найруулахаар болжээ. 

2025 оны зургаадугаар сарын 20-нд нээлтээ хийсэн энэхүү хөгжимт анимэйшн киноны дуунууд дэлхий даяар 15 тэрбум гаруй удаа сонсогдоод байгаа бөгөөд Netflix-ийн маркетингийн захирал Мариан Ли үүнийг зүгээр нэг хит бүтээл бус, нэгэн үеийнхний үзэгдэл болж чадсаныг онцолсон байна.