Итали Улсаас Монгол Улсад суугаа Элчин сайдын яамнаас "Италийн спортын өдөр 2026"-ыг тохиолдуулан АНУ-ын Элчин сайдын яам болон Монголын Үндэсний Олимпын Хороо (МҮОХ)-той хамтран цахим семинар (вебинар) амжилттай зохион байгууллаа. Тус арга хэмжээгээр спорт нь соёл хоорондын гүүр болох, эдийн засгийн өсөлтийг дэмжих болон олон улсын дипломат харилцааны чухал хэрэгсэл болох тухай гол сэдвүүдийг хөндөн хэлэлцэв.

Арга хэмжээг нээж Итали Улсаас Монгол Улсад суугаа Онц бөгөөд Бүрэн эрхт Элчин сайд Жованна Пиккаррета болон МҮОХ-ны Ерөнхийлөгч Батболдын Баттүшиг нар албан ёсны үг хэллээ. Вебинарын хаалтын үгийг АНУ-ын Элчин сайд Ричард Буанган хэлсэн бөгөөд тэрбээр 2028 онд Лос-Анжелес хотноо зохион байгуулагдах Олимп, Паралимпын наадмын бэлтгэл ажлын талаар танилцуулсан юм. Үүгээрээ 2026 оны Милан-Кортинагийн Өвлийн Олимпыг зохион байгуулах Итали улс болон "Лос-Анжелес 2028" Зуны Олимпыг хүлээн авах АНУ-ын талууд Олимпын буухиаг цахим хэлбэрээр дамжуулан өглөө.

Цахим семинарт салбар бүрийн онцлох зочид оролцож, сонирхолтой илтгэлүүд тавьсан байна. Үүнд:

• Марко Ражини (Монголын хөлбөмбөгийн үндэсний шигшээ багийн итали ахлах дасгалжуулагч): Монголын залуу авьяастнуудыг нээн илрүүлэх, хөгжүүлэх болон тус улсад хөлбөмбөгийн спортын ирээдүйн чиг хандлагын талаар.

• Сайнбаярын Жамбалжамц (Монголын дугуйн спортын тамирчин): Азийн наадмаас хүрэл медаль хүртсэн сэтгэгдэл, туршлагаасаа.

• Альберто Затта (Монгол дахь Италийн Худалдааны танхимын Ерөнхий нарийн бичгийн дарга): Спорт, инноваци болон бизнесийн уялдаа холбоо, тэр дундаа спортын дэд бүтэц дэх хувийн хэвшлийн оролцооны талаар тус тус байр сууриа хуваалцав.

Энэхүү вебинар нь спортын салбараар дамжуулан олон улсын хамтын ажиллагааг бэхжүүлэхэд чухал түлхэц болсон үйл явдал боллоо.