Монголын спортын түүхэнд урьд өмнө үзэгдээгүй нэгэн агуу байр суурь, шинэ содон хуудас албан ёсоор нээгдлээ!

Азербайжан Улсын нийслэл Баку хотноо зохион байгуулагдсан Олон улсын сүмогийн холбооны ээлжит хурлаас Монгол түмний бахархал, Японы мэргэжлийн сүмогийн 69 дэх Их аварга, Монгол Улсын Хөдөлмөрийн баатар, Гавьяат тамирчин Хакүхо Мөнхбатын Даваажаргал Олон улсын сүмогийн холбоо (IFS) болон Азийн сүмогийн холбооны Ерөнхийлөгчөөр нэгэн зэрэг давхар сонгогдсон түүхэн шийдвэр гарав.

Баку хотын хурлын танхимаас шууд тодорсон энэхүү баярт үйл явдал нь Монгол хүн анх удаа дэлхийн болон тивийн хэмжээний спортын бодлого, стратеги, олон улсын томоохон хамтын ажиллагааг удирдан манлайлах хамгийн дээд, өндөр хариуцлагатай сэнтийд зэрэг заларсныг тунхаглаж байна.

34 жилийн түүхтэй "Олон улсын сүмогийн холбоо"-г Монгол хүн тэргүүлнэ

1992 онд анх тулгын чулуугаа тавьж байсан Олон улсын сүмогийн холбоо (IFS) нь Японы уламжлалт сүмо бөхийн спортыг дэлхий дахинд түгээн хөгжүүлэх, Дэлхийн аварга шалгаруулах тэмцээнийг зохион байгуулах, олон улсын үндэсний холбоодын нэгдсэн бодлогыг тодорхойлдог гол байгууллага юм. Өдгөө тус холбооны дээвэр дор дэлхийн 80 гаруй улсын үндэсний холбоод нэгдэн үйл ажиллагаа явуулдаг.

Харин Азийн сүмогийн холбоо нь тус спортын эх ундарга болсон Ази тивийн улс орнуудад сүмог түгээн дэлгэрүүлэх, тивийн чанартай тэмцээн уралдааныг зохион байгуулах чиг үүрэгтэй. Их аварга Хакүхо ийнхүү дэлхий болон тивийн холбоог зэрэг гардан удирдахаар болсноор сүмогийн спорт олон улсын шинэ шатанд гарах маш том түүхэн боломж бүрдэж байна.

Дэвжээн дээр түүх бүтээсэн Монгол хүү

1985 онд Улаанбаатар хотноо төрж өссөн М.Даваажаргал 15-хан насандаа арлын Японыг зорин очиж, 2007 онд мэргэжлийн сүмогийн хамгийн дээд цол болох Ёкозүна хүртэж байсан түүхтэй. Тэрээр сүмогийн олон зуун жилийн түүхэнд урьд хожид хэн ч хүрч чадаагүй агуу амжилтуудыг батжуулсан билээ:

• Дээд зиндаанд хамгийн олон буюу 45 удаа түрүүлсэн

• Мэргэжлийн сүмогийн түүхэнд нийт 1,187 ялалт байгуулсан

• Макүүчи буюу дээд зиндаанд 1,093 удаа ялалт байгуулсан

• Нэг ч уналгүйгээр, босоо түрүүлсэн нь 16 удаа

• Цувраа 63 барилдаанд дараалан ялалт байгуулсан

Сүмог олимпын шинэ түвшинд хүргэх их үйлс

Их аварга Хакүхо М.Даваажаргал мэргэжлийн сүмогийн дэвжээнээс зодог тайлсан ч тус спортыг дэлхийн хэмжээний наадмуудад багтаах, цаашлаад Олимпын спорт болгохын төлөө идэвхтэй зүтгэсээр ирсэн юм. Түүний манлайлал дор сүмогийн спорт олон улсын тавцанд дараах гурван том алхмыг хийгээд байна:

1. Азийн наадам — Нагоя 2026: Японы Аичи-Нагоя хотноо зохион байгуулагдаж буй Азийн XX наадмын хүрээнд сүмо бөхийн спорт "ONE ASIA WORLD" соёл, спортын танилцуулга хөтөлбөрт багтлаа. Энэ нь сүмог Азийн наадмын албан ёсны медалийн төрөл болгох замналын хамгийн том суурь юм.

2. Дэлхийн нүүдэлчдийн наадам — Киргиз 2026: Киргиз Улсад амжилттай зохион байгуулагдсан Дэлхийн нүүдэлчдийн VI наадмын хөтөлбөрт сүмо бөх албан ёсоор багтсан нь Их аваргын хувийн нөлөө, хүчин зүтгэлтэй шууд холбоотой.

3. Дэлхийн наадам — Герман 2029: Бакуд болсон энэхүү хурлын үеэр хамгийн сүүлд зарласан баярт мэдээ бол ХБНГУ-ын Карлсруэ хотноо болох "The World Games" буюу Дэлхийн наадмын албан ёсны хөтөлбөрт сүмогийн спорт бүрэн багтахаар болсон явдал байв.

Монгол хүний манлайлал дэлхийн тавцанд

Монголчууд бид олимп, дэлхийн аваргын дэвжээн дээр алтан соёмбот далбаагаа мандуулдаг тамирчдаараа үргэлж бахархдаг. Тэгвэл өнөөдөр Монголын хүү зөвхөн дэвжээн дээр түрүүлээд зогсохгүй, дэлхийн хэмжээний спортын аварга том бүтцийг удирдан чиглүүлэх түвшинд хүрсэн нь Монголын спортын гадаад харилцааны түүхэнд алтан үсгээр бичигдэх амжилт юм.

Нэгэн цагт Японы мэргэжлийн сүмогийн дэвжээг бүрэн эзэгнэж, бүх цаг үеийн дээд амжилтыг шинэчлэн тогтоож байсан Монгол аварга өдгөө дэлхийн сүмогийн ирээдүйн хувь заяаг зурах Жинхэнэ удирдагч боллоо!

Их аварга Хакүхо М.Даваажаргалдаа спортын сайтын нийт уншигчдын нэрийн өмнөөс халуун баяр хүргэж, дэлхийн сүмог Олимпын тавцанд гаргах их үйлсэд нь өндөр амжилт хүсэн ерөөе! Монгол хүний босоо хийморь дэлхийн тавцанд үүрд мандах болтугай!