ТАТАР МАЙДАР
Казахстаны Астана хотноо зохион байгуулагдаж буй чөлөөт бөхийн насанд хүрэгчдийн ДАШТ-ээс Монголын баг тамирчдын медалийн салхийг хагалж, ОУХМ Энх-Амарын Даваанасан хүрэл медаль хүртлээ.
Тэрбээр эмэгтэйчүүдийн хамгийн хүнд буюу 76 кг-ын жингийн хүрэл медалийн төлөөх шийдвэрлэх барилдаанд Кыргызстаны шилдэг бөх, ДАШТ-ий мөнгө, хүрэл медальт Айпери Медет Кизытэй тунан үлдэж, өрсөлдөгчөө 4:1-ээр илүүрхэн яллаа.
Э.Даваанасан нь "Белград-2023" ДАШТ-ий 72 кг-ын жинд мөнгөн медаль хүртэж байсан бол энэ удаад жин өгсөн 76 кг-д хүч үзэж, дэлхийн аваргын хошой медальтан гэх эрхэм алдрыг хүртэж байна. Тэрбээр өнөө жил Азийн аварга шалгаруулах тэмцээнд түрүүлсэн бөгөөд ийнхүү ДАШТ-ий хүрэл медалиар амжилтаа бататган, Монгол түмнээ баярлууллаа.
Эх орныхоо нэрийг дэлхийн дэвжээнд өндөрт өргөсөн дэлхийн аваргын хошой медальтан Э.Даваанасандаа халуун баяр хүргэж, цаашдынх нь спорт, амьдралын замналд өндөр амжилт хүсье!
|
Спорт
