Хүүхэд, залуусын хамгийн сайн мэдэх, волейбол сонирхогчдын дунд асар их алдартай "The Spike Cross" (хуучнаар DAERISOFT компанийн гаргаж байсан, Studio SUNCYAN-ий хөгжүүлсэн) гар утасны тоглоомд Монголын бахархал болсон волейболчин, ОУХМ Жамьяанпүрэвийн Энхсоёлын дүрийг албан ёсоор нэмж оруулахаар болжээ. 

Ж.Энхсоёл (тоглоомын ертөнц дэх нэр нь Inkushi) нь БНСУ-ын Волейболын дээд лиг буюу мэргэжлийн "V-League"-ийн хүчирхэг "Red Sparks" багийн үндсэн тоглогч бөгөөд 2025 онд Солонгосын волейболын амьд домог Ким Ён Кон (Kim Yeon-koung)-ы удирдсан "The Wonder Coach" телевизийн шоунд амжилттай оролцож, "Wonder Dogs" багийн гол довтлогчоор шалгарч байсан түүхтэй. "The Spike" тоглоом болон "Wonder Dogs" багийн хамтын ажиллагаа нийт 7 долоо хоногийн турш үргэлжлэх бөгөөд албан ёсны шинэчлэлт (Update) ирэх 11 дүгээр сарын 11-ний өдрөөс эхлэн тоглоомд нэвтрэхээр зарлагджээ. Ж.Энхсоёл маань тус тоглоомд хамгийн дээд зэрэглэл болох "EX" зэрэглэлийн довтлогч (WS - Wing Spiker) дүрээр нэмэгдэж байгаа нь энэ юм.

Тоглоомын үзүүлэлтээр тэрээр баг дотроо хамгийн өндөр үсрэлттэй болон хамгийн хүчтэй, хурдтай цохилттой (spike speed) тамирчнаар бүртгэгджээ. Энэхүү давуу тал нь түүнийг тоглолтын явцад өрсөлдөгч багийн хоёр давхар хаалтыг (double blocks) маш хүчтэй довтолгоогоор задалж, шууд оноо авах өндөр үр ашигтай тоглогч болгож байгаа юм. Түүнчлэн Ж.Энхсоёл нь тус тэмцээний дүрүүд дундаас хамгийн хүнд бөгөөд техникийн өндөр ур чадвар шаардсан, хүчтэй үсрэлттэй давуулалтыг (high-caliber jump serve) төгс гүйцэтгэж чаддаг цөөхөн тоглогчийн нэгээр тусгайлан бүтээгдсэн байна. Ийнхүү дэлхийн сая сая залуус тоглоомын хамгийн хүчирхэг "EX" зэрэглэлийн довтлогч болох Монгол тамирчны дүрээр кибер талбарт давамгайлах боломж бүрдлээ.