Ираны дэмжлэгтэй Йемений зэвсэгт хуситууд пүрэв гарагт тус улсын Засгийн газрын түр нийслэл Аден хотод байрлах Аль-Маашик Ерөнхийлөгчийн ордны цогцолбор руу пуужингийн ширүүн цохилт өгсөн байна. Довтолгооны улмаас ордны хамгаалалтын алба болон энгийн ажилчдаас бүрдсэн 5 хүн амь үрэгдэж, 16 хүн шархадсан бөгөөд энэ нь өнгөрсөн долдугаар сараас хойш тус ордныг чиглэсэн анхны томоохон халдлага боллоо. Халдлага болох үеэр Йемений Ерөнхий сайд Шая аль-Зиндани ордонд байсан ч ямар нэгэн байдлаар бэртэж гэмтээгүй бөгөөд тэрээр энэхүү үйлдлийг энгийн иргэд, объектуудыг онилсон хуситуудын хулчгар гэмт хэрэг хэмээн хатуу зэмлэн буруутгасан байна.

Албаны эх сурвалжийн мэдээлснээр хуситууд тус ордон дахь Йемений засгийн газрын цэргийн командлалын төвийг 3 пуужингаар, харин тэднийг дэмжигч Саудын Араб тэргүүтэй цэргийн эвслийн командлалын төвийг 2 пуужингаар тус тус оносон байна. Сүүлийн долоо хоногуудад хуситууд Улаан тэнгисийн эрэг дагуух Йемений газар нутгийг асар хурдтайгаар эзлэн авч, Саудын Арабын агаарын дэмжлэгтэй засгийн газрын цэргийн сөрөг довтолгоонууд тэднийг ухрааж чадахгүй байна. Үүнтэй холбогдуулан Саудын Арабын тал Ираны засаг захиргааг хуситуудыг зэвсэглэж, сургаж, мөргөлдөөнийг улам дэвэргэж байна хэмээн албан ёсоор буруутгалаа. Саудын Арабын Гадаад хэргийн яамнаас мөргөлдөөнийг намжаахаар Оманы Мускат хотод уулзах санал тавьсан ч хуситууд татгалзсан гэдгийг мэдэгдсэн байна.

Ойрхи Дорнодын дайн өнгөрсөн хоёрдугаар сард АНУ болон Израилийн зүгээс Иранд өгсөн цохилтоос үүдэн шинэ шатанд гарсан бөгөөд сүүлийн үед Саудын Араб улс хуситуудын гол бай болоод байна. Өнгөрсөн бямба гарагт Саудын Арабын нийслэл Эр-Рияд хотын олон улсын нисэх онгоцны буудал руу хуситууд цохилт өгөх үеэр 13 хүн амиа алдаж, 300 орчим хүн шархадсан нь тус улсад сүүлийн арав гаруй жилд гарсан хамгийн хөнөөлтэй халдлага болсон юм. Саудын Арабын цэргийн эвслээс хуситуудыг бүс нутгийн тоглогчдын тусламжтайгаар баллистик пуужин, амиа золиослогч дрон, тэсрэх бодис бүхий хурдан завиар зэвсэглэсэн орчин үеийн технологитой террор ажиллагаагаа нэн даруй зогсоохыг шаардаж байна. НҮБ-ын мэдээлснээр Йемений энэхүү иргэний дайн нь дэлхийн хамгийн хүнд хүмүүнлэгийн хямралыг дагуулж, тус улсын хүн амын дийлэнх хэсгийг олон улсын тусламжаас хамааралтай болгоод байна.