Монгол Улсын Засгийн газраас нийгмийн эрүүл мэндийн тогтолцоог сайжруулах, хүн ардаа өвдөхөөс нь өмнө урьдчилан сэргийлэх, эрт илрүүлгийн сайжруулах зорилгоор хөдөө, орон нутаг болон дүүргүүдэд “Эрүүл мэндийг дэмжих төв”-ийг шат дараатай шинээр байгуулж байна. Энэ хүрээнд Өвөрхангай аймгийн Бүсийн Оношилгоо эмчилгээний төвд шинээр “Эрүүл мэндийг дэмжих төв”-ийг энэ сарын 15-нд ашиглалтад оруулахаар ажиллаж байна. Тус дэмжих төвийг УНТЭ-ийн Эрүүл мэндийн дэмжих төвийн жишгээр үлгэрлэн зохион байгуулж, эмч мэргэжилтнүүдээ сургах, чадавхжуулах ажлуудыг хийжээ.

ЭМЯ-аас Өвөрхангай аймагт шинээр ашиглалтад орж буй Эрүүл мэндийг дэмжих төвд шаардлагатай тоног төхөөрөмж,  засвар үйлчилгээ, зураг төсөл гээд бүх талыг дэмжлэгийг үзүүлж байна. Энэхүү дэмжих төв нь ашиглалтад орсноор Өвөрхангай аймгийн төдийгүй Бүсийн 250 орчим мянган иргэдэд урьдчилан сэргийлэх үзлэг, оношилгоо, эрүүл мэндийн боловсрол олгох зөвлөгөө, мэдээлэл зэрэг олон талын үйлчилгээг үзүүлэх юм. 

ЭМЯ-аас таван том цогц ажлын хүрээнд нотолгоо, шинэ технологид суурилсан эрүүл мэндийг дэмжих төвүүдийг байгуулах ажлууд орон нутаг, дүүргүүдэд үргэлжилсээр байна.