Сүхбаатар аймагт өнгөрсөн оны арванхоёрдугаар сарын 5-26-нд нохойд хазуулсан хэмээн эмнэлэгт хандсан 8-56 насны есөн иргэнд галзуугийн эсрэг вакцины оронд сүрьеэгийн эсрэг БЦЖ вакциныг хийсэн ноцтой хэргийн тухай албаныхан мэдээлэл өглөө.

Эрүүл мэндийн сайд С.Чинзориг "Энэ хэрэг нэг өдөр гарсан биш. Мөн бүгд нэг нохойд хазуулсан ч биш. Өнгөрсөн 2022 оны арванхоёрдугаар сарын 5-26-ны хооронд есөн хүн долоон нохойд хазуулсан. Нохойд хазуулсан хүнд галзуугийн эсрэг вакциныг гурван удаа тарих эрүүл мэндийн зааварчилгаатай. Гэтэл нохойд хазуулсан гэх есөн иргэнд галзуугийн эсрэг вакцины оронд сүрьеэгийн вакцин хийж мэргэжлийн ноцтой алдаа гаргасан байна. Эдгээр иргэдийн гуравт нь гурван удаагийн хатгалтаар сүрьеэгийн эсрэг вакциныг тарьсан нь нэг хүнд хийх ёстой тун хэмжээг 30 дахин, дөрвөн иргэнд хоёр удаа хийхдээ 20 дахин өсгөсөн тунгаар, нэг удаа тариулсан иргэнд хийвэл зохих тунг 10 дахин өсгөсөн хэмжээгээр хийсэн байна. Иргэдийн эрүүл мэндэд сөрөг үр дагавар үзүүлэхүйц ийм хэрэг гарсанд харамсаж ард түмнээсээ уучлал хүсэж байна.

ЭМЯ-наас мэргэжлийн баг Сүхбаатар аймагт ажиллуулж нохойд хазуулсны улмаас галзуугийн эсрэг вакцины оронд сүрьеэгийн вакцин хийлгэсэн иргэдийн биеийн байдал ямар байгаа болон тэдний эрүүл мэндэд гарч буй сөрөг нөлөөг тогтоохоос гадна уг вакциныг ямар газраас хүлээж авсан талаарх мэдээллийг шалгаж тогтоох ажлыг хийж байгаа юм. 

Ном журмаараа бүх төрлийн вакциныг хийхийн өмнө тухайн иргэнд хаана үйлдвэрлэсэн ямар төрлийн вакцин тарих гэж байгааг болон вакцины хүчинтэй хугацааны тухай мэдээллийг тодорхой өгөх дүрэмтэй. Энэ дүрэм зөрчигдсөн эсэхийг ч тогтоох юм. Мөн эрүүл мэндийн байгууллага дээр ийм хэрэг гарсан нь ажил хариуцаж буй хүмүүс албан тушаалдаа хариуцлагагүй хандсантай холбоотой юу гэдгийг шалгаж, дүгнэлт гаргана" гэв.

С.Чинзориг сайд вакцин андуурагдаж тариулсан иргэдтэй холбоотойгоор “Нохойд хазуулсны улмаас галзуугийн эсрэг вакцин хийх байтал сүрьеэгийн вакцин хийсэн учраас сүрьеэ өвчнөөр өвчлөх магадлал маш өндөр байна. Нөгөө талдаа нохойд хазуулсан хүмүүст галзуугийн эсрэг вакцин хийгдээгүй учраас энэ төрлийн өвчлөл гарах магадлал байгаа. Хамгийн богинодоо хоёр сар, дээд талд нь хоёр сар хагасын хугацаанд хариу гардаг юм байна. 

Хоёр төрлийн вакциныг андуурч хийсэн тохиолдол манай улсад анх удаа гарсан учраас тухайн иргэдийг сүрьеэгээр өвчлүүлэхгүйгээр Монголд бүрэн эмчлэх боломжтой гэсэн баталгааг эрүүл мэндийн байгууллага өгч чадахгүй ч энэ төрлийн вакцины хүчийг сааруулах, сүрьеэгээр өвчлүүлэхгүй байх эм, тарианы нөөц хангалттай гэдгийг ХӨСҮТ-ийн удирдлага хэлж байгаа. Дээрх есөн иргэнийг ойрын хугацаанд Улаанбаатарт авчирч, оношлогоо эмчилгээг хийхээс гадна Монголдоо эмчилж чадахгүй бол зардлыг нь Засгийн газрын нөөцөөс шийдүүлж, гадаад оронд эмчлүүлэхээс өөр аргагүй” хэмээсэн.

Эмнэлгийн тусламж, үйлчилгээний хэлтсийн дарга Ж.Нарангэрэл “Одоогийн байдлаар найман иргэнийг эрүүл мэндийн үзлэг, оношилгоонд хамруулаад байна. Эдгээрээс нэг хүн уушгины доод хэсэгт нэвчдэс сүүдэртэй байна гэх шалтгаанаар дотрын тасагт хэвтэн эмчлүүлж байна. Тухайн иргэдийг Улаанбаатар хотод авчирч, шаардлагатай оношилгоо шинжилгээг хийж, эмчилгээнд хамруулах боломжтой бөгөөд одоогоор биеийн байдал нэн хүнд гэсэн оноштой хүн байхгүй. Найман иргэнд вакцин тарьсан хэсэг газарт хавдах, улайх зэрэг хэсэг газрын урвал илэрсэн бол нэг иргэнд буглаа үүсч,  мэс ажилбар хийлгэсэн. Хоёр хүүхдийн биеийн ерөнхий үзүүлэлт хэвийн байна” хэмээлээ.  

Халдварт өвчин судлалын үндэсний төвийн ерөнхий захирал Ц.Билэгтсайхан “Сүрьеэгийн эсрэг БЦЖ вакциныг Энэтхэг улсын Серум институтэд үйлдвэрлэсэн сүрьеэгийн амьд сулруулсан вакцин байна. Тус вакциныг хэрэглэхдээ нэгээс доош насныханд арьсан дор 0,05 мл, нэгээс дээш насны хүүхдүүдэд 0,1 мл-ээр нэг удаа тарьж дархлаажуулдаг. Энэ удаагийн тохиолдолд гурван иргэнд гурван удаагийн тун, дөрвөн иргэнд хоёр удаагийн, хоёр иргэнд нэг удаагийн тун буюу нийт есөн иргэн 19 удаагийн хатгалтаар БЦЖ вакцин тариулсан. Эмнэлзүйн шинж тэмдгийг тандаж байна. Нохойд хазуулсан хүнд галзуугийн вакциныг 3-6 удаагийн давтамжтай тарих журамтай”гэлээ.