Өчигдөр буюу Арваннэгдүгээр сарын 10-ны үдээс хойш Багшийн дээдийн буудал дээр хоёр давхар автобус шатсан. НОБГ-ын гал унтраах шуурхай алба найман минутын хугацаанд галыг унтраасан бөгөөд хүн бэртэж гэмтээгүй. Урьдчилсан байдлаар цахилгааны массаас үүдэн гал гарсан байх магадлалтай бөгөөд шалтгаан нөхцөлийг бүрэн тогтоохоор НОБГ-ын гал унтраах шуурхай албаны бүрэлдэхүүн хойшлуулшгүй ажиллагаа явуулж байна.

2 давхар автобуснууд нь 7 жилийн баталгаат хугацаатай бөгөөд энэ хугацаанд ашиглалтаас үл хамаарсан гэмтэл гарвал үйлдвэрлэгч хариуцахаар гэрээнд заасан юм байна.

Тухайн 2 давхар ногоон автобус туршилтаар ирэхдээ 2 тэнхлэгтэй байсан ч одоо үйлчилгээнд буй автобус 1 тэнхлэгтэй болсон талаар НЗДТГ-ын Хэвлэл мэдээлэл, олон нийттэй харилцах хэлтсээс: 

"Худалдан авах гэрээнд 1 тэнхлэгтэй 10,5 м урт 10 ширхэг цахилгаан автобус гэж заажээ. Тэгэхээр гэрээнд зөрчилгүй гэсэн үг. Гэхдээ гэрээ байгуулахаас өмнө туршилтаар явуулсан 2 автобус нь 12 м урттай, 2 тэнхлэгтэй байж. Яагаад 1 тэнхлэгтэй, 10,5 м болгож өөрчилж, гэрээнд тусгасан гэдгийг тэр үед ажил хариуцаж байсан хүмүүс тодорхой мэднэ. Цаасан дээр үлдсэн баримтад ингэж тусгасан байна" гэх тайлбарыг өглөө.