Сонгомол болон чөлөөт бөхийн шигшээ багийн тамирчид Хятад улсын Шиян хотод болсон олон улсын тэмцээнд амжилттай оролцоод ирлээ. Тус тэмцээн нь ДБНХ-ны календарьд  “The belt and road” нэрээр энэ жилээс багтсан бөгөөд Сонгомол бөх, Чөлөөт бөх (эр, эм), Хятад үндэсний бөх гэсэн гурван төрлөөр 2024 оны арваннэгдүгээр сарын 11-13-ны өдрийн хооронд нийт найман улс оролцсон, олимп, дэлхийн медальтнууд цугласан өрсөлдөөнтэй тэмцээн болж өндөрлөв. Чөлөөт бөхийн төрлөөр ОУХМ Б.Мөнх-Эрдэнэ /57кг/ алтан медаль, СМ Б.Бадамдорж /97кг/ мөнгөн медаль, ОУХМ Г.Уртнасан /76кг/ хүрэл медалийн эзэд болжээ. Тус тэмцээний гурав дахь өдөр Хятад үндэсний  бөхийн -87 кг жинд ОУХМ Г.Төрболд алтан медаль, СМ Н.Оргил хүрэл медаль, +87 кг СМ Б.Бадамдорж хүрэл медаль хүртсэн байна. Сонгомол бөхийн төрлөөр СМ Б.Бадамдорж эхний тойрогт 2024 оны азийн аваргын хүрэл медальт Хятад улсын бөх Hao Houzhi-г 3:0 оноогоор ялж, хоёрдугаар тойрогтоо  европын аварга Азербайжан улсын бөх Murad Ahmadiyev-т 8:0 оноогоор ялагдаж, хүрэл медалийн төлөө Өмнөд Солонгосын бөх Jo Yeonjun-д 3:3  буюу сүүлийн оноогоор хожигдож тэмцээнээ өндөрлөв.