Б.ЭНХЗАЯА
Соёл, Спорт, Аялал жуулчлал, Залуучуудын яамнаас Түүх, соёлын дурсгалт зүйл, урлагийн бүтээлээр дамжуулан хүүхэд, залуучууд болон гэр бүлийн гишүүдэд үндэсний бахархал, эх оронч үзлийг төлөвшүүлэх, гэр бүлийн боловсрол, хамтын оролцоог дэмжих зорилгоор “МУЗЕЙН НЭЭЛТТЭЙ ӨДРҮҮД 2026” арга хэмжээг 03 дугаар сарын 01-ний өдрөөс 07-г хүртэлх хугацаанд улсын хэмжээнд зохион байгуулах гэж байна.
“Музейн нээлттэй өдрүүд 2026” арга хэмжээний хүрээнд нийслэл хот болон 21 аймагт үйл ажиллагаа явуулдаг төрийн болон орон нутгийн өмчийн бүх музей иргэд олон нийтэд үнэ төлбөргүй үйлчлэх юм.
Мөн төр, нийгмийн нэрт зүтгэлтэн, Монгол Улсын Ерөнхий сайд Агданбуугийн Амар мэндэлсний 140, Монгол Улсын Ерөнхий сайд асан Жамбын Батмөнх мэндэлсний 100, их зохиолч Дашдоржийн Нацагдорж мэндэлсний 120 жилийн ой зэрэг бусад түүхэн хүмүүсийн дурсгалыг мөнхжүүлэх агуулгын хүрээнд:
- Олон нийтийн оролцоог хангасан тусгай үзэсгэлэн, боловсролын хөтөлбөр, лекц, уулзалт хэлэлцүүлэг
- Гэр бүлийн аялал, хүүхэд-эцэг эхийн хамтарсан танин мэдэхүйн тоглоом, бүтээлч ажил, соёлын өв, уламжлал таниулах, музейн тайлбарлагчтай аялал зэрэг гэр бүлд чиглэсэн боловсрол, оролцооны хөтөлбөр
- Хүүхэд, залуучууд музейн орчинд зөв зохистой хандах, соёлын өвийг хамгаалах хандлагыг дэмжих, мэдлэг ойлголтыг нэмэгдүүлэх бүтээлч ажлууд
- Музейн сан хөмрөг дахь түүх, соёлын дурсгалуудын хадгалалт хамгаалалт, сэргээн засварлалт, судалгааны ажлын ач холбогдол, онцлогийг олон нийтэд таниулахад чиглэсэн олон талт арга хэмжээ тус тус зохион байгуулагдах юм.
|
Нийгэм
