Б.ЭНХЗАЯА
Монгол Улсын Засгийн газрын 2026 оны 3 дугаар сарын 25-ны өдрийн хуралдаанаар Монгол Улсын Ерөнхий сайдаар ахлуулсан “Нийгмийн эрүүл мэндийн Үндэсний зөвлөл”-ийг дахин сэргээж, 26 хүний бүрэлдэхүүнтэй байгууллаа.
Зөвлөлийн орлогч даргаар Эрүүл мэндийн сайд, Нарийн бичгийн даргаар Эрүүл мэндийн яамны Нийгмийн эрүүл мэндийн бодлогын хэрэгжилтийн газрын дарга ажиллана.
Тус зөвлөл байгуулагдсанаар нийгмийн эрүүл мэндийн үйл ажиллагааг нэгтгэн удирдах, халдварт болон халдварт бус өвчний эрсдэлийг удирдах, урьдчилан сэргийлэх тогтолцоог бэхжүүлэх чухал ач холбогдолтой юм.
Нийгмийн эрүүл мэндийн Үндэсний зөвлөл нь салбар бүрийн бодлогод эрүүл мэндийн асуудлыг тусгах шийдвэр гаргах, салбар хоорондын уялдаа холбоог хангах гол үүрэгтэй.
Өвчний хяналт, сэргийлэлтийн үндэсний төв нь үндэсний зөвлөлийн бодлого, шийдвэрийг хэрэгжүүлэх үүрэгтэй бөгөөд нийгмийн эрүүл мэндийн тандалт, лаборатори, тархвар судлал, мэдээллийн систем, ноцтой байдлын хариу арга хэмжээ зэрэг үйл ажиллагааг шуурхай зохион байгуулж, бодлого, шийдвэрийг хэрэгжүүлнэ.
Засгийн газрын энэхүү шийдвэр нь олон улсын зохион байгуулалт, Монгол Улсын хууль, урт, дунд хугацааны хөгжлийн бодлоготой нийцсэн бөгөөд нийгмийн эрүүл мэндийн бодлогын нэгдмэл байдлыг хангах чухал алхам болж байна.
|
Нийгэм
