"Оскар"-ын шагналт Австралийн жүжигчин. Ирланд, шотланд гаралтай. Шилдэг жүжигчний шагналыг нэхэн хүртсэн "Оскар" төдийгүй Австралийн кино институтийн дээд шагналын түүхэн дэх анхны жүжигчин бол Хит Леджер юм.
Гайхалтай чадварлаг жүжигчин өөрийн карьертаа нийт 19 кинонд туслах болоод гол дүрүүдийг бүтээсэн аж. Түүний олон сайхан дүр бидний сэтгэлд мөнхрөн үлдсэн бөгөөд хамгийн алдартай дүр нь “The Dark Knight” киноны “Joker” билээ. Дэлхий даяар гайхагдсан уг киноны алиалагчийн дүрийг хэний ч санаанд оромгүй гайхалтай бүтээхийн тулд тэрээр зочид буудалд орь ганцаар 43 хоног амьдарчээ. Өөрийн бүтээсэн Жокерийн инээмсэглэл болон дуу хоолойг бусдынхаас онцгойруулахын тулд Лежер дуу хоолойны төрөл бүрийн өнгө аяс, хэмнэлийг туршиж үзэж байв.
Тэр ч бүү хэл өөрийнхөө дуу хоолойг улам аймшигтай болгохын тулд тусгай багш хүртэл авч хичээллэж байжээ. Өдөрт хэдхэн цагаар унтана, ингэснээр өөрийгөө илүү уур хилэнтэй, туйлдаа хүрсэн хүн шиг харагдуулна гэж үзсэн байна.
Удаан хугацаанд үргэлжилсэн зураг авалт дууссаны дараа Лежер нойргүйдлээр шаналж байсан нойрсуулах эмийг өндөр тунгаар хүртэж байв.
Алдарт Жокерын дүрийг бүтээж байх үед түүний амьдралын хамгийн чухал, эрхэм хүн нь Мишель байлаа. Тэд анх кинонд хамтран тоглохдоо танилцаж, цаашлаад болзох болсон юм. Хосууд 2004 гэр бүл болж, аз жаргал хайраар бялхаж, бяцхан охины эцэг эх болжээ. Тэдний охин Матильда 2005 онд төржээ.
Амьдралын үнэ цэнийг ухаарч, олон олон жилийг хамтдаа өнгөрүүлэхийг хүсэж байсан тухайгаа Мишель дараа нь ярилцлага өгсөн байдаг.
Гэвч Хит Леджер “Жокер”-ийн дүрийг бүтээж байх хугацаандаа зан ааш нь хачин гэмээр хувирсан төдийгүй хар тамхи ихээр хэрэглэх болсон байна. Энэ нь тэдний харилцаанд сэв суулгаж, бяцхан охиндоо ч сэтгэлийн шарх өгч байв. Ийн байдалтай явсаар нэрт жүжигчин 2008 оны 1 дүгээр сарын 22-нд таалал төгсч, шүтэн бишрэгчид болоод гэр бүлийнхэндээ нөхөж баршгүй гарз учруулсан билээ. Түүний цогцсыг Йоркийн Манхэттен дүүрэг дэх орон сууцнаас нь гэрийн үйлчлэгч нь хамгийн түрүүнд олсон бөгөөд үхлийн шалтгааныг хар тамхи хэтрүүлэн хэрэглэснээс болсон хэмээн дүгнэжээ. Хэтийдсэн их авьяас, нөр их хүч хөдөлмөрөөр Жокерийн дүрийг төгс төгөлдөр бүтээгээд одсон тэрээр 28 настай байв. Түүний хайртай бүсгүй Мишель, “Түүнээс минь хойш Жокер хэмээх үгс миний амьдралаас үүрд явсан” гэжээ.
