ОХУ-д коронавирусийн тархалт эрс нэмэгдэж байгаатай холбогдуулан Монгол, Оросын Засгийн газрын холбогдох байгууллагууд, Монгол Улсаас ОХУ-д суугаа Элчин сайдын яам, сургууль, дотуур байрны захиргаанаас өгч буй зөвлөмж, түүнчлэн тухайн хот, сургууль, дотуур байранд тогтоосон дэглэм, журмыг чанд сахиж эрүүл мэндээ хамгаалж, аюулгүй байдлаа хангахыг анхааруулаад байна.
ОХУ-ын Засгийн газрын холбогдох албан тушаалтнууд, эмч мэргэжилтнүүдийн төсөөлж байгаагаар тус улс дахь коронавирусийн тархалт ойрын хоёр долоо хоногийн хугацаанд оргил үедээ хүрэх магадлалтай байгаа тул энэ хугацаанд “өөрийгөө тусгаарлах” дэглэмийн заалт бүрийг нэг бүрчлэн мөрдөхийг зөвлөж байгаа юм.
Жич: 2020 оны дөрөвдүгээр сарын 14 буюу өнөөдөр өдрийн байдлаар ОХУ-д суралцаж буй Монгол оюутнуудын дөрөвний нэг гаруй нь сургуулийнхаа захиргааны зөвшөөрөл, зөвлөмжийн дагуу нутаг буцаад байгаа билээ.
Эх орон руугаа яваагүй байгаа оюутнуудыг хот, сургуулийн нэр, дотуур байрны хаяг, суралцаж буй курс, утасны дугаар зэргийг тусгасан мэдээллийг сургууль, дотуур байрныхаа хэмжээнд нэгтгэн Монгол Улсаас ОХУ-д суугаа Элчин сайдын яаманд [email protected] хаягаар ирүүлэхийг хүсье. Түүнчлэн, уг мэдээлэлдээ тухайн сургууль, дотуур байранд нийтдээ хэдэн Монгол оюутан суралцдаг, оршин суудаг, тэдгээрээс хэд нь үлдээд байгааг тэмдэглэнэ үү хэмээн Монгол Улсаас ОХУ-д суугаа Элчин сайдын яамнаас анхааруулж байна.
