ЭМЯ-аас коронавирусний цаг үеийн асуудлаар өдөр бүр 11:00 цагт мэдээлэл хийж ард иргэдэд үнэн зөв мэдээллийг өгч байгаа. Тэгвэ өнөөдөр Эрүүл мэндийн яамнаас коронавирусийн халдварын талаар ээлжит мэдээлэл өглөө. Өнөөдрийн байдлаар улсын хэмжээнд 987 иргэн ажиглалтад байна. Тусгаарлах байрнаас 72 иргэн гарчээ. Орон нутгийн гал тэргэнд төмөр замын нэгдсэн эмнэлгээс 11 эмч мэргэжилтэн 3800 гаруй хүнд тандалт судалгаа хийжээ .
Эрүүл мэндийн яамны 24 цагийн 119 шуурхай утсанд нийт 313 дуудлага иржээ. Гадаадаас Шведээс зургаа, АНУ-гаас хоёр иргэн хандаж, зөвлөгөө авчээ. АНУ амьдарч байгаа монгол иргэн коронавирусээр өвчилсөн байна. Мөн иргэдээс гудамж талбайд хэрэглэсэн амны хаалтыг хаяж байна гэх гомдол ирүүлжээ. Хэрэглэсэн амны хаалтыг ил задгай хаях нь халдвар тархах эрсдэлтэй гэдгийг анхаарууллаа.
Улсын хэмжээнд өчигдрийн байдлаар нийт 44 хүнд шинжилгээ хийсэн. Тандалтын зорилгоор хийсэн долоон сорьцын шинжилгээнээс коронавирус илрээгүй. Өмнөговь аймагт тусгаарлагдсан иргэнээс коронавирус илрээгүй. ХӨСҮТ-д тусгаарлагдсан сэжигтэй тохиолдлоос коронавирус илэрлээ. Тавдугаар сарын 3-нд Франкфуртын онгоцоор ирсэн иргэнээс илэрсэн. Шинж тэмдэг нь маш тод илэрсэн. Толгой өвдөж, хоолонд дургүй болж нус гоожсон. Коронавирусийн батлагдсан 42 тохиолдол боллоо.
Эрдэмтэд коронавирусний хоёр дахь давалгаанаас сэргийлэхийг анхааруулж байна
Дэлхийн эрдэмтэн судлаачид улс орнуудыг коронавирусний халдварын хоёр дахь давалгаанаас сэргийлэхийг анхааруулж байна. БНХАУ-ын эрдэмтдийн хийсэн судалгаагаар коронавирусний халдвар авсан иргэдийн үрийн шингэнээс вирус илэрчээ. Гаднаас зөөвөрлөгдөн орж ирсэн тохиолдлуудыг ажиглахад хоёр, гурав дахь давтан шинжилгээний дараа халдвар нь илэрч байна. Тиймээс тусгаарлалтын хугацааг 21 хоног болгосон нь манай орны нөхцөл байдалд их тохирч байна. Одоогийн байдлаар гадаадын улс орнуудад амьдарч буй 20 гаруй иргэнээс коронавирусний халдвар илэрсэн. Үүнээс нь 15 нь эдгэрч, таван хүн гэрийн тусгаарлалтад байна. Эрүүл мэндийн байгууллагаас эмч мэргэжилтнүүдийн бэлэн байдлыг хангах чиглэлээр ажиллаж байна.
Эрүүл мэндийн сайдын тушаалаар судалгааны тэргүүлэх долоон чиглэлийг тодорхойллоо. Тухайлбал, хүн амын давхарга, эмзэг бүлгийнхэн дунд халдвар тархах эрсдэлийг судлах, улирлын коронавирусийн эмнэлзүйн оновчтой эмчлэх аргыг тодорхойлох, гэрийн тэжээмэл болон зэрлэг амьтдад коронавирусийг илрүүлэх зэргийг тодорхойлжээ. Судалгааны ажлыг ХӨСҮТ, ЗӨСҮТ-ийн хамтарсан есөн баг хариуцан ажиллаж байна.
