Дэлхийн хэмжээнд коронавирусний халдвар авсан хүний тоо 4 сая 800 мянгад хүрч, 320 мянга орчим хүн нас бараад байна. Энэхүү цар тахлыг хяналтдаа авч, дарахын тулд дахин маш удаан хугацаа шаардлагатай гэдгийг ДЭМБ-ын тэргүүн сануулсан байна.
Зөвхөн сүүлийн 24 цагийн хугацаанд дэлхийн хэмжээнд халдварын 106,662 тохиолдол шинээр бүртгэгдсэн байна. Энэ нь цар тахал дэгдсэнээс хойш дэлхийн хэмжээнд нэг өдрийн дотор бүртгэгдсэн хамгийн өндөр үзүүлэлт юм байна.
2 долоо хоног хүрэхгүй хугацааны өмнө коронавирусээр халдварлагсдын тоо дэлхийн хэмжээнд 4 саяд хүрч байсан бол энэ тоо одоо 5 сая хүрэхэд ойрхон байгаа нь халдвар маш хурдацтай тархаж байгаагийн илрэл юм. Ихэнх орнуудад коронавирусийг илрүүлэх шинжилгээ хангалттай түвшинд хийгдэж чадахгүй байгаа учир бодит байдал дээр халдварын тохиолдол албан ёсны тоо баримтаас хамаагүй их байгаа хэмээн шинжээчид үзэж байна.
АНУ ковид-19 цар тахлын халдвараар дэлхийд тэргүүлж байгаа ч хөл хориогоо сулруулсаар байгаа юм. Тус улсад халдварын нийт 1,5 сая орчим тохиолдол бүртгэгдэж, 92 мянга гаруй хүн амиа алдаад байна..
Эх сурвалж: ВВС
