Бразил улсад зөвхөн сүүлийн нэг хоногт коронавирусээр 1179 хүн амиа алдсан нь тус улсад цар тахал дэгдснээс хойш нэг өдрийн дотор нас барсан хамгийн өндөр үзүүлэлт болж байна.
Ковид-19 цар тахлын халдвараар дэлхийд 3 дугаарт бичигдэж байгаа Бразил улсад халдварын нийт 254,220 батлагдсан тохиолдол бүртгэгдэж, 17 мянга орчим хүн амиа алдаад байна. Нөхцөл байдал ийн хүнд байгаа ч тус улсын Ерөнхийлөгч Жайр Болсонаро хөл хорио тогтоохын эсрэг байр суурьтай хэвээр байгаа юм.
Бразилийн томоохон хотуудын нэг болох 12 сая орчим хүн амтай Сан-Пауло хотод халдварын тархалт хамгийн өндөр байгаа юм. Өчигдрөөс тус хотод бүх нийтийн 5 өдрийн амралт эхэлсэн байна. Энэ 5 өдөрт халдварын тохиолдол буурна гэдэгт засгийн газар нь найдаж байгаа юм байна.
Сүүлийн нэг сарын дотор эрүүл мэндийн хоёр ч сайд нь огцорсон Бразил улсад коронавирусний эмчилгээнд хлорохин болон гидроксихлорохин эмийг хэрэглэх шийдвэрийг гаргасан байна.
