Улсын их дэлгүүрт энэ сарын 7-нд гарсан галын шалтгаан, хохирлын хэмжээг ойрын хугацаанд тогтоож, танилцуулахыг Шадар сайд Ө.Энхтүвшин цагдаа, онцгой байдлын байгууллагын удирдлагуудад өнөөдөр үүрэг болгов.
Тэрбээр өнөөдөр цагдаа, онцгой байдлын байгууллага, нийслэлийн удирдлагуудтай уулзаж, УИД-т гарсан галын шалтгааныг тогтоох ажлын явцтай танилцсан юм.
УИД-т гал гарсан тухай дуудлага онцгой байдлын байгууллагад энэ сарын 7-ны 16.48 цагт иржээ. Дуудлагын дагуу нийслэлийн онцгой байдлын 8 ангийн 230 алба хаагч ажиллаж, 21:30 цагт бүрэн унтраажээ. Галын тархалтыг дуудлага ирснээс 40 минутын дараа зогсоосноор 6, 7 дугаар давхарт гарсан галыг 1-5 давхарт тархахаас сэргийлжээ.
Улмаар 4 цаг гаран ажиллаж галыг бүрэн унтраасан бөгөөд энэ хороонд байгууламжид байсан 7 хүнийг аварч, Онцгой байдлын 2 алба хаагч хорт утаанд угаартсан бөгөөд нэн даруй эмнэлэгт хүргэсэн байна. Алба хаагчдын биеийн байдал хэвийн байгааг онцгой байдлын байгууллагын удирдлагууд Шадар сайд Ө.Энхтүвшинд танилцууллаа.
ОБЕГ-ын тэргүүн дэд дарга, бригадын генерал Г.Ариунбуян “Галыг унтраахад “Сүү” компанийн 4 албан хаагч 4 автомашинтай ажилласан.
“Сүү” компани болон УСУГ нийслэлд гарсан галыг унтраахад дэмжих томилолттой байгууллага юм.
Энэ жил УИД-т НОБГ-аас төлөвлөгөөт шалгалт хийсэн. Шалгалтын үеэр галын аврах гарцыг хааж бараа хураасан, дохиолол нь гэрэлтүүлэггүй, гал түймэр гарсан үед хүний амь аврах зориулалтын гарц тодорхой болгоогүй, гал унтраах багаж хэрэгсэл хангалтгүй зэрэг зөрчил илэрсэн.
Тиймээс албан шаардлага хүргүүлж, зарим зүйлсийг шалгалтын явцад залруулсан юм. Ер нь хүн ам олноор цуглардаг газрууд, гэр хорооллын айл өрх, үйлдвэр, худалдааны төвүүдэд шалгалт хийдэг. Нэг зүйлийг онцолж хэлэхэд хот төлөвлөхдөө гидрант буюу ус шахах хоолойг тусгадаггүй. Тиймээс өндөр орон сууц, худалдааны төвүүд заавал гаднаа гидранттай байх шаардлага тавьдаг болох нь зөв” гэлээ.
Гал гарсан шалтгааныг тогтоохоор Чингэлтэй дүүргийн цагдаагийн газрын алба ажиллаж байна.
Тухайлбал, энэ сарын 8-нд 25 мөрдөн байцаагч, Шүүхийн шинжилгээний үндэсний хүрээлэнгийн 20 шинжээч, 20 прокурор хэргийн газарт үзлэг хийж эхэлжээ. Энэ үеэр эхний ээлжинд 240 түрээслэгч, 220 цэгт шалгалт хийсэн байна.
Одоо байгууламжийн 6, 7 дугаар давхар буюу гал гарсан хэсэгт үзлэг хийж байгаа бөгөөд угаарын хий бүрэн арилаагүй, гал унтраасан их хэмжээний ус хэвээр байгаа зэрэг нь хүндрэл үүсгэж байгааг цагдаагийн байгууллагын удирдлагууд танилцуулж байлаа.
Шалгалтын хүрээнд УИД-т засвар хийж байсан ажилтнуудаас мэдүүлэг авсан байна. Энэ үеэр нэг ажилтан нь “Дээвэрт засвар хийж байхдаа хар цаас наахаар халааж байх явцад дээврийн завсрын хөөсөнд галын дэгдэлт ихэссэн” гэсэн мэдүүлэг өгснийг мөн дурдсан юм. Одоогоор түрээслэгчдийн бараа материалд үзлэг, тооллого хийж, хохирлын үнэлгээг гаргаж байгаа бөгөөд бүрэн бүтэн байгаа барааг эзэнд нь хүлээлгэн өгчээ.
Шадар сайд Ө.Энхтүвшин “Барилгын норм, дүрэм журмыг эргэж харах нь зөв. Тухайлбал, олон хүн ажилладаг, олон байгууллага түрээслэдэг газар хий хэрэглэхийг зөвшөөрөх эсэх, хэрэглэсэн тохиолдолд ямар хяналт тавих вэ гэдэгт анхаарах шаардлагатай. Улаанбаатар хотын төвийн ихэнх барилга 1940-1950 онд баригдсан. Тухайн үед гидрант төлөвлөөгүй. Тиймээс нийслэлд хэдэн гидрант байгааг тогтоох, шинэчлэх, стандартын шаардлагад нийцүүлэх, шинээр бий болгохыг цаашдын төлөвлөгөөндөө тусгах хэрэгтэй. Өндөр барилгад гарсан галыг унтраахад бусад улсад ашигладаг дэвшилтэт технологи нэвтрүүлэх, зориулалтын автомашин, өндрөөс гал унтраах, хайгуул хийх хүчин чадалтай нисгэгчгүй төхөөрөмж буюу дрон авах асуудлыг судалж, шаардагдах хөрөнгө оруулалтын тооцоог гаргах хэрэгтэй. Үүнийг улс, нийслэлийн төсөвт тусгах хэрэгтэй юм” гэлээ.
