Монгол Улс, Европын Холбооны хамтын ажиллагааны хамтарсан хорооны 20 дугаар хуралдаан өнөөдөр цахимаар боллоо.Хамтарсан хорооны хуралдааныг монголын талаас Гадаад харилцааны сайд Н.Энхтайван, Европын Холбооны талаас Европын Холбооны Гадаад харилцааны албаны Ази, Номхон далайн газрын захирал Гуннар Виганд нар даргалсан.
Хуралдааны үеэр улс төр, худалдаа, эдийн засаг, хөгжлийн хамтын ажиллагаа, хүний эрх, байгаль орчин, эрчим хүч, иргэд хоорондын харилцаа зэрэг бүхий л салбарын хамтын ажиллагааны өнөөгийн байдал, цаашдын төлвийн талаар санал солилцож, цаг үеийн асуудлаар илэн далангүй ярилцлаа.
Гадаад харилцааны сайд Н.Энхтайван “COVID-19” цар тахал Монголын төдийгүй дэлхий нийтийн нийгэм, эдийн засагт сөргөөр нөлөөлж буйг онцлооод энэхүү сорилтот үед хамтран ажиллаж байгаад Европын Холбоонд талархал илэрхийлэв. “COVID-19” цар тахалтай тэмцэх хүрээнд Европын Холбооноос вакцин авах боломжийг судлахыг хүсээд дэлхий нийтээр тархсан цар тахлыг хамтын ажиллагааны дүнд амжилттай давж гарна гэдэгт итгэлтэй буйгаа онцлов.
Хамтын ажиллагааны чухал бүрэлдэхүүн болох хөгжлийн хамтын ажиллагааны ажлын dgгийг байгуулан анхдугаар хуралдааныг зохион байгуулснаар Европын Холбооны хөгжлийн тусламжид үргэлжлүүлэн хамрагдах, тусламжийг Монгол Улсын Алсын хараа 2050 хөтөлбөртэй уялдуулахад чухал ач холбогдолтой болсныг манай тал тэмдэглэсэн юм.
Талууд Монгол Улс Европын Холбоонд бараа бүтээгдэхүүн татваргүй экспортолдог “GSP+” хөнгөлөлтөд хамрагдаж буй хэдий ч энэхүү хөтөлбөрийг бүрэн ашиглаж чадахгүй байгааг онцлоод Монгол Улсын экспортын чадавхийг бэхжүүлэх, экспортын зах зээлийг төрөлжүүлэх чиглэлээр хамтарч ажиллахаар тохиролцов. Энэ хүрээнд Европын Холбооны талаас Европын Холбооны зах зээлд бараа бүтээгдэхүүн экспортлох үеийн Эрүүл ахуй, ургамлын эрүүл ахуйн шаардлагын талаар дэлгэрэнгүй танилцуулж, мэдээлэл солилцов. Монголын талаас Европын Холбоонд экспортлохоор төлөвлөж буй 20 гаруй нэр төрлийн бараа бүтээгдэхүүний жагсаалтыг эцэслэснээ танилцуулж, ойрын хугацаанд хүргүүлэхээр тохиролцов.
Европын Холбооны талаас Монгол Улсын мөнгө угаах, терроризмтой тэмцэх тогтолцоогоо сайжруулах, холбогдох хууль эрх зүйн орчноо богино хугацаанд сайжруулсныг тэмдэглэв. Европын Холбоо нь хоёр талын хамтын ажиллагааны өнөөгийн түвшинд сэтгэл өндөр буйгаа илэрхийлээд цаашид хамтын ажиллагааг өргөжүүлэх, чингэхдээ түүхий эдийн чиглэлээр хамтран ажиллах сонирхлоо илэрхийллээ.
Хамтарсан хорооны хуралдааны хүрээнд өнгөрсөн сарын 23-25-нд Худалдаа, хөрөнгө оруулалтын дэд хороо, Хөгжлийн хамтын ажиллагааны ажлын багийн хуралдаан, Хүний эрхийн асуудлаарх яриа хэлэлцээг зохион байгуулсан байна.
Талууд хуралдааны үеэр хэлэлцэж тохирсон асуудлаар Хамтарсан протокол үйлдэж, 2021 онд хамтран ажиллах ажлын төлөвлөгөөг батлан хэрэгжүүлэхээр тохиролцсон юм.
