Туркийн Истанбул хотод 16 сая орчим хүн амьдардаг бөгөөд нийтийн тээврийн үндсэн хэрэгцээг метро хангадаг. Өргөн газар нутаг хамарсан, хүн ам тархан суурьшсан энэ хотын захиргаа Истанбул хотын захиргаа метроны жолоочоор сурах, ажиллах эмэгтэйчүүдийн тоог нэмэгдүүлэхийг зорьж байна. 3 жилийн өмнө 8-хан эмэгтэй жолоочтой байсан бол өнөөдөр нийт метроны жолооч 800 хүний 120 гаруй нь эмэгтэй болж тоон үзүүлэлт өссөн байна. Истанбулын метроны чиглэл, өртөө тасралтгүй нэмэгдсээр байгаа нь эмэгтэйчүүд ажиллах боломжийг илүү олгож байна.
Метроны жолооч Марва Озкаяа: "Эхэндээ би ийм ажлын талаар бодож байгаагүй. Ажилд орох заруудыг үзээд гэр бүл, ээж, аав, нөхөртэйгээ хамт энэ ажлыг хийх чадварынхаа талаар бодож эхэлсэн бөгөөд ажилд орох хүсэлт өгөөд үзэхээр шийдсэн. Ажилд тэнцсэнээ мэдээд олон янзын сургалт дамжаанд сууснаар одоо ажлаа хийж эхлээд жил хагас болсон байна.
Метроны жолооч байх эмэгтэй хүний хувьд тийм ч хэцүү зүйл биш, эрэгтэй эмэгтэй хүмүүст адилхан л хөдөлмөрийн нөхцөл байгаа. Би өглөө ажилдаа явахаар 4 цагт босдог, манай хамт ажилладаг бусад эрэгтэй жолооч нар ч бас 4 цагт босдог.
Нөхөр маань анх ажилд ороход ээлжээр ажиллах тухай мэдэж байсан учраас бид гэрийн ажлаа ээлжлээд хийдэг. Хэрвээ би өглөө ажилтай бол өдөр гэртээ байна, өдөр ажилтай бол өглөө бусад гэрийн ажлаа амжуулна гэх мэт. Бас хэдийгээр метро тасралтгүй ажиллаж байгаа ч бидэнд 7 хоногийн амралтын өдөр байдаг нь их таалагддаг" гэлээ.
Эх сурвалж: А24 мэдээний агентлаг
