Арабын Нэгдсэн Эмират улсын Абу Даби хотноо өнөөдөр 2021 оны IJF-ийн дэлхийн цувралын хамгийн сүүлийн тэмцээн Их дуулга ангилалаар зохион байгуулагдах гэж байна. Тэмцээний сугалааны үйл ажиллагаа өчигдөр явагдаж нийт 41 орны 137 эрэгтэй, 88 эмэгтэй жүдоч хуран чуулаад байна. Өнөөдөр тэмцээний эхний өдөр -60 кг-д ОУХМ Энхтайваны Сумъяабазар ОХУ-ын Аюуб Блиевтэй эхний тойрогт таарсан байна. Тэрбээр өрсөлдөгчөө ялсан тохиолдолд Их Британы Самуэль Холл, Канадын Жульен Фраскадор нарын ялсантай хэсгийн аваргын төлөө хүч үзнэ. Харин Бямбасүрэнгийн Сүхбат эхний даваандаа энэ оны Парисын Их дуулгын мөнгөн медальт ОХУ-ын Рамазан Абдулаевтай барилдана. Манай бөх өрсөлдөгчөө ялсан тохиолдолд залуучуудын олимпын хүрэл медальт Украйны Олег Вередьябатай барилдахаар оноолт таарчээ. -66 кг-ын жинг ДАШТ-ий хүрэл медальт ОУХМ Ё.Басхүү тэргүүлэн барилдах бөгөөд эхний даваандаа Кыргызстаны Байбол Саламат Уулутай учраа таарсан. Мөн залуу мастер Гүнжинлхамын Сод-Эрдэнэ -60 кг-аас жин өгсөж барилдаж буй ДАШТ-ий 5-р байр, Азийн аваргын хүрэлтэй Кыргызстаны Кубаничбек Айбек Уулутай учраа таарсан байна. Харин эмэгтэйчүүдийн -52 кг-д Бишрэлтийн Хорлоодой эхний тойрогт Европын аваргын мөнгө, хүрэл медальт Португалын Жоана Диоготой, Ганболдын Ганцэцэг “Токио-2020” олимпын хүрэл медальт Их Британы Челси Жайлестай учраа таарсан байна. Мөн -57 кг-д Лхагватогоогийн Энхрийлэн Польшийн Арлета Подолактай эхний тойрогт учраа таарсан бөгөөд ялсан тохиолдолд тэмцээний чансааг тэргүүлэгч Израйлын Тимна Нельсон Левайтай хэсгийн аваргын төлөө хүч үзнэ.Харин Батсүхийн Алтанцэцэг Европын залуучуудын АШТ-ий хүрэл медальт Чехийн Вера Земановатай учраа таараад байна. Тэмцээн өнөөдөр Улаанбаатарын цагаар 16:00 цагт эхлэх бөгөөд медалийн төлөөх барилдаанууд 21:00 цагаас явагдана.
Тэмцээнийг шууд дамжуулах линк: http://judolive01.lb.judobase.org/live/
