Арабын Нэгдсэн Эмират улсын Абу Даби хотноо 2021 оны IJF-ийн энэ оны хамгийн сүүлчийн дэлхийн цуврал тэмцээн эхэллээ. Тэмцээнд нийт 41 орны 137 эрэгтэй, 88 эмэгтэй жүдоч өрсөлдөж байгаа бөгөөд уламжлал ёсоор хөнгөн жингийн барилдаануудаар эхэлсэн юм. Тэмцээний эхний өдөр -60 кг-д ОУХМ Энхтайваны Сумъяабазар ОХУ-ын Аюуб Блиевийг эхний тойрогт торгуулиар ялсан ч Их Британы Самуэль Холлд даралтаар цэвэр, торгуульд Украйны Дилшот Халматовт вазари үнэлгээгээр ялагдлаа. Түүнтэй хамт энэ жинд өрсөлдсөн Бямбасүрэнгийн Сүхбат эхний даваандаа энэ оны Парисын Их дуулгын мөнгөн медальт ОХУ-ын Рамазан Абдулаевт нэмэлт цагт вазари үнэлгээгээр ялагдсанаар үзэгчдийн эгнээнд шилжив. Харин -66 кг-ын жинг тэргүүлэн барилдсан ДАШТ-ий хүрэл медальт ОУХМ Ё.Басхүү эхний даваандаа Кыргызстаны Байбол Саламат Уулутай учраа таарч тохох мэхээр цэвэр ялсан ч Европын залуучуудын АШТ-ий хүрэл медальт ОХУ-ын Исмайл Мисировт хөмрөх мэхээр цэвэр ялагдлаа. Улмаар манай бөх дагах барилдаанд Узбекистаны Дилшодбек Юлдошевийг даралтаар цэвэр ялаад хүрэл медалийн төлөө Францын Валид Хяртай оноолт таараад байна. Энэ жинд зодоглосон залуу мастер Гүнжинлхамын Сод-Эрдэнэ -60 кг-аас жингээс өгсөж барилдаж буй ДАШТ-ий 5-р байр, Азийн аваргын хүрэл медальт Кыргызстаны Кубаничбек Айбек Уулуд эхний тойрогт ялагдал хүлээлээ. Харин эмэгтэйчүүдийн -52 кг-д Бишрэлтийн Хорлоодой эхний тойрогт Европын аваргын мөнгө, хүрэл медальт Португалын Жоана Диогог, хэсгийн аваргын төлөө Польшийн Александра Калетаг өөрийн дархан шахаж татах мэхээр цэвэр ялсан. Гэвч хагас шигшээд олимп, дэлхийн мөнгөн медальт Францын Амандин Бушарт цэвэр ялагдсанаар хүрэл медалийн төлөө Мароккогийн Соумия Ираоуйтай барилдахаар боллоо. Түүнтэй хамт энэ жинд өрсөлдсөн Ганболдын Ганцэцэг “Токио-2020” олимпын хүрэл медальт Их Британы Челси Жайлест ялагдсанаар тэмцээнээ дуусгажээ. Харин -57 кг-д Лхагватогоогийн Энхрийлэн хүрэл медалийн төлөө өрсөлдөхөөр шалгараад байна. Тэрбээр Польшийн Арлета Подолакийг нэмэлт цагт вазари үнэлгээгээр ялсан бол хэсгийн аваргын төлөө Израйлын Тимна Нельсон Левайд ялагдсан бол дагах барилдаанд Бельгийн Мина Либирийг хоёр вазари үнэлгээгээр буюу цэвэр ялсан байна. Тэрбээр хүрэл медалийн төлөө Европын залуучуудын аваргын мөнгөн медальт Их Британы Аселъя Топрактай барилдана. Түүнтэй хамт энэ жинд өрсөлдсөн ОУХМ Батсүхийн Алтанцэцэг Европын залуучуудын АШТ-ий хүрэл медальт Чехийн Вера Земановатай учраа таарч өрсөлдөгчөө хоёр торгуулиар илүүрхэж байсан ч даралтаар цэвэр ялагдаж үзэгчдийн эгнээнд шилжсэн байна. Тэмцээний медалийн төлөөх барилдаанууд Улаанбаатарын цагаар 21:00-д эхлэх бөгөөд SPS телевизээр болон доорх линкээр хүлээн авч үзэх боломжтой.
Тэмцээнийг шууд дамжуулах линк: http://judolive01.lb.judobase.org/live/
