Өчигдөр явагдсан БНСУ-ын Ерөнхийлөгчийн сонгуулийн дүн шөнө гарч сөрөг хүчний сөрөг хүчний хамгийн том нам болох консерватив үзэлт Ардын хүч намын нэр дэвшигч Юн Сук Ёол ялалт байгууллаа.
БНСУ-ын Үндсэн хуулиар Ерөнхийлөгч 5 жилийн хугацаатай нэг удаа сонгогддог. Цар тахлын халдвар өндөр байгаа ч сонгогчдын ирц 77 хувьд хүрч байгаа нь дэлхий бусад улсуудынхтай харьцуулахад ирц хамгийн өндөр байгаа тохиолдол юм.
Сонгуулийн өмнөх санал асуулгын дүнгээс харахад эрх баригч Ардчилсан намын нэр дэвшигч И Жэ Мён болон Ардын хүч намын нэр дэвшигч Юн Сук Ёол нарын аль нэг нь Ерөнхийлөгчийн сонгуульд ялалт байгуулахаар байсан юм.
Ерөнхийлөгчийн сунгаанд ялалт байгуулсан Консерватив үзэл баримтлалтай Ардын хүч намаас нэр дэвшигч Юн Сук Ёолыг аз од нь гийсэн прокурор гэж БНСУ-ын хэвлэлүүд нэрлэдэг.
Тэрээр тус улсын хоёр экс ерөнхийлөгч, Самсунг компанийн тэргүүн, тус улсын Дээд шүүхийн ерөнхий шүүгч нарын өндөр түвшний авлигын гэмт хэргийг илрүүлэхэд голлох үүрэг гүйцэтгэснээрээ ард түмний дунд нэр хүнд олж авсан юм.
Юн Сук Ёол өнөөгийн Ерөнхийлөгч Мүн Жэ Иний Засгийн газар болон эрх баригч Ардчилсан намыг орон сууцны үнэ тэнгэрт тулж, орлогын тэгш бус байдал нэмэгдсэнд буруутгаж сонгуулийн сурталчилгаа хийсэн. "Саяхныг хүртэл би улс төрд орно гэж төсөөлж байгаагүй. Гэхдээ ард түмэн намайг одоо байгаа байр сууринд тавьж, чадамжгүй, авлигад идэгдсэн Ардчилсан намыг төрөөс зайлуулах даалгавар өгсөн" хэмээн сонгуулийн уулзалтын үеэр мэдэгдсэн.
Юн 1960 оны 12-р сарын 18-нд Сөүл хотод төрсөн. Түүний аав коллежийн профессор, ээж нь багш байсан. Сөүлийн их сургуулийг төгссөн тэрээр 1994 онд 9 дэх удаагийнхаа хуульчийн шалгалтад тэнцэж, прокурор болж байлаа. Тэрээр Солонгосын хамгийн баян, хамгийн хүчирхэг хүмүүсийн авлигын хэргийн араас хөөцөлдөхдөө улс төрийн дарамт шахалтад автаагүй цэгц шударга мөрдөн байцаагч гэдгээрээ нэрд гарсан.
Тэрээр өнгөрсөн жил ерөнхий прокурорын суудлаасаа бууж, консерватив Ардын хүчний намаас ерөнхийлөгчийн сонгуульд нэр дэвшсэн. Юн Сук Ёол Өмнөд Солонгосын ерөнхийлөгч болсон анхны прокурор болж байна.
