Мал эмнэлгийн салбар өнгөрсөн оны ажлаа дүгнэж, хүрсэн үр дүн, алдаа дутагдлаа хэлэлцэн, ирэх онд хийж хэрэгжүүлэх ажлаа төлөвлөхөөр Удирдах ажилтны зөвлөгөөнөө зохион байгуулж байна. Зөвлөгөөнд ХХААХҮЯ-ны Төрийн нарийн бичгийн дарга Т.Жамбалцэрэн МЭЕГ, аймаг, нийслэлийн мал эмнэлгийн газар, харьяа байгууллагын удирдлагууд оролцож байна.
Монгол Улсын Ерөнхийлөгчийн санаачилсан “Хүнсний хангамж, аюулгүй байдлыг хангах талаар авах зарим арга хэмжээний тухай” тогтоолоор малын гоц халдварт өвчинтэй тэмцэх цогц арга хэмжээг эрчимжүүлэх, био бэлдмэлийн дэвшилтэт технологи нэвтрүүлэх, вакцины хүйтэн хэлхээний сүлжээг бий болгох, мал эмнэлгийн оношилгооны лабораторийг чадавхжуулах, үйлчилгээний нэгжийн үйл ажиллагааг бэхжүүлэх зэрэг тодорхой шийдвэрүүд гарсан.
Мал эмнэлгийн салбарын үйл ажиллагааг жигдрүүлэх, ажлын бүтээмж, чанар хариуцлагын тогтолцоог нэмэгдүүлэх, салбарын байгууллагуудын хоорондын уялдаа холбоог нэмэгдүүлж, мал, амьтны гоц халдварт өвчний гаралт, тархалтыг бууруулах, таслан зогсоох, өвчингүй тайван байдалд шилжин, хүнсний аюулгүй байдлыг хангах, экспортыг нэмэгдүүлэх чиглэлээр мал эмнэлгийн салбарын үйл ажиллагааг хэрэгжүүлж байна.
Мөн 2023 онд Монгол Улсад Шинжлэх ухааны мал эмнэлэг үүсч, хөгжсөний түүхт 100 жилийн ой тохиож байгаагаараа илүү онцлогтой юм.
Мал эмнэлгийн ерөнхий газраас 2023 оныг Хүн төвт хөгжлийн жил болгон зарласантай холбогдуулан салбарт дутагдалтай хүний нөөцийг хэрхэн бүрдүүлэх, малын эмч, төрийн албан хаагч нарын мэдлэг ур чадварыг сайжруулах олон талт ажлыг төлөвлөн ажиллаж байна.
