Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Казахстан Улсын Ерөнхийлөгч Касым-Жомарт Кемелевич Токаев төрийн айлчлал хийж байна.
Энэ хүрээнд Монгол Улсын Соёл, спорт, аялал жуулчлал, залуучуудын яам Бүгд Найрамдах Казахстан Улсын Соёл, мэдээллийн яам, Аялал жуулчлал, спортын яамтай тус тус хамтран ажиллах тухай харилцан ойлголцлын санамж бичгийг байгууллаа.
Соёлын салбарт:
Соёлын салбар дахь ололт амжилтын талаар мэдээлэл солилцох,
Соёл, урлагийн үзэсгэлэн, урлагийн тоглолт, кино үзвэр зохион байгуулах,
Соёлын биет болон биет бус өвийг хамгаалах, судлах,
Хоёр улсад зохион байгуулагддаг соёл, урлагийн наадамд харилцан оролцох,
Соёлын салбарт эрдэм шинжилгээний хамтын ажиллагааг дэмжинэ.
Аялал жуулчлалын салбарт:
Аялал жуулчлалын салбарын аж ахуйн нэгжүүд, тур операторуудын хамтын ажиллагаа, хөрөнгө оруулалтыг дэмжих,
Өөрийн улсын нутаг дэвсгэрт зохион байгуулагддаг аялал жуулчлалын үзэсгэлэн, экспод оролцохыг дэмжих,
Аялал жуулчлалын салбарын сурталчилгаа, маркетинг, хөгжил, хүний нөөцийг сургах болон дахин сургахад дэмжлэг үзүүлэх,
Хил орчмын аялал жуулчлал болон тогтвортой аялал жуулчлалыг дэмжиж, хамтран ажиллахаар тохиролцлоо.
Энэхүү харилцан ойлголцлын санамж бичиг нь Монгол, Казахстан хоёр улсын хооронд соёл, аялал жуулчлалын салбарт хамтын ажиллагааг өргөжүүлж, хоёр улсын ард иргэдийн харилцан ойлголцол, найрамдлыг гүнзгийрүүлэхэд томоохон алхам болж, хоёр улсын хөгжилд шинэ боломжуудыг нээх чухал үүрэг гүйцэтгэнэ.
