Цаг уурчдын мэдээлснээр ирэх өдрүүдэд ихэнх нутгаар түр зуур дулаарах төлөвтэй байгаа бөгөөд цас ихтэй зарим аймагт шар усны үерийн эрсдэл нэмэгдэхийг анхаарууллаа.

Тодруулбал, гуравдугаар сарын 9-нөөс 11-ний өдрүүдэд ихэнх нутгаар агаарын температур нэмэгдэх төлөвтэй байна. Үүнтэй холбоотойгоор цас ихтэй бүс нутгуудад, ялангуяа Сэлэнгэ аймаг, Дархан-Уул аймаг, Увс аймаг, Баян-Өлгий аймаг-ийн нутгаар шар усны үер үүсэх өндөр эрсдэлтэй байгааг малчид, иргэд, тээвэрчдэд анхааруулж байна.

Өнөө шөнө, маргаашийн цаг агаар

2026 оны гуравдугаар сарын 8-ны 20:00 цагаас 9-ний 20:00 цаг хүртэл нутгийн баруун хэсгээр үүлшинэ, бусад нутгаар солигдмол үүлтэй байх төлөвтэй. Шөнөдөө Монгол-Алтайн уулархаг нутгаар, өдөртөө Монгол-Алтай болон Хангайн уулархаг нутгаар ялимгүй цас орж, бусад нутгаар хур тунадас орохгүй.

Салхи ихэнх нутгаар баруун өмнөөс секундэд 5-10 метрийн хурдтай салхилна.

Агаарын температур шөнөдөө Увс нуурын хотгор, Тэс голын хөндийгөөр -27...-32 градус хүрч хүйтрэх бол Дархадын хотгор, Хөвсгөл, Хэнтийн уулархаг нутгаар -22...-27 градус хүйтэн байна. Харин говийн бүс нутгийн баруун өмнөд хэсгээр -1...-6 градус хүйтэн байх төлөвтэй. Өдөртөө ихэнх нутгаар 0...+5 градус дулаан, говийн өмнөд хэсгээр +9...+14 градус хүрч дулаарна.

Нийслэл орчмын цаг агаар

Улаанбаатар хот орчмоор шөнөдөө үүлшинэ, өдөртөө үүл багасна. Салхи баруун өмнөөс секундэд 3-8 метр. Шөнөдөө Яармаг-Сонгины орчмоор -17...-19 градус, бусад хэсгээр -11...-13 градус, өдөртөө +3...+5 градус дулаан байна.

Багануур дүүрэг орчмоор шөнөдөө -19...-21 градус, өдөртөө 0 градус орчим байх бол Горхи-Тэрэлжийн байгалийн цогцолборт газар орчмоор шөнөдөө -22...-24 градус, өдөртөө +1...+3 градус дулаан байх төлөвтэй байна.

Ирэх өдрүүдийн төлөв

Гуравдугаар сарын 10-нд Монгол-Алтайн уулархаг нутгаар ялимгүй цас орно. Харин 11-нд баруун аймгуудын ихэнх нутаг, төвийн аймгуудын баруун хэсгээр, 12-нд төвийн аймгуудын ихэнх нутгаар болон баруун, зүүн аймгуудын зарим хэсгээр цас орж, салхи ширүүсэх төлөвтэй.

Мөн 13-нд төв, зүүн болон говийн аймгуудын ихэнх нутгаар бороо, нойтон цас орж, хүчтэй цасан болон шороон шуурга шуурахыг цаг уурчид анхааруулж байна.

Салхи 11-13-ны өдрүүдэд зарим нутгаар секундэд 18-20 метр хүрч ширүүсэх бол 12-ноос эхлэн ихэнх нутгаар эрс хүйтрэх төлөвтэй байна. Тухайлбал баруун болон төвийн зарим нутгаар шөнөдөө -30...-35 градус хүрч хүйтрэхийг мэдээлжээ.