Ойрын тав хоногт цаг агаарын аюултай үзэгдэл тохиож, хүчтэй салхи, шороон болон цасан шуурга шуурахыг цаг уурын байгууллагаас онцгойлон анхаарууллаа.

Дөрөвдүгээр сарын 17-18-нд шилжих шөнөөс эхлэн баруун аймгуудын зарим нутгаар салхи ширүүсч, 18-ны өдөр Ховд, Увс, Булган, Архангай, Төв, Говь-Алтай, Баянхонгор, Өвөрхангай, Дундговь, Өмнөговь аймгуудын нутгаар секундэд 18-20 метр, зарим үед 24 метр давж ширүүсэх төлөвтэй байна. Мөн энэ өдөр Өвөрхангай, Өмнөговь, Төв, Дундговийн зарим хэсгээр шороон шуурга, Увс болон Завханы зарим нутгаар цасан шуурга шуурах юм.

Цаашлаад 19-нд нутгийн зүүн хагаст, 20-нд говь, талын бүс нутгаар салхи дахин ширүүсч, зарим үед секундэд 28 метр хүрэх хүчтэй шуурга үргэлжлэх төлөвтэй байна.

Иймд малчид, иргэд, тээвэрчдийг 17-19-ний өдрүүдэд онцгой анхаарал болгоомжтой байхыг анхааруулж, холын замд гарахгүй байх, малаа ойр бэлчээх, бага насны хүүхдийг хараа хяналтгүй орхихгүй байхыг зөвлөж байна.

Хур тунадасны хувьд 17-нд баруун болон хойд нутгийн уулархаг бүсээр бороо, нойтон цас орж, 18-20-нд ихэнх нутгаар, ялангуяа төв болон зүүн аймгуудаар хур тунадас, цас орж, зарим газраар цасан шуурга шуурах төлөвтэй байна.

Агаарын температурын хувьд 18-19-нд ихэнх нутгаар эрс сэрүүсч, шөнөдөө зарим уулархаг нутгаар -15…-20 градус хүрч хүйтрэх бол говийн бүс нутгаар харьцангуй дулаан хэвээр байх юм. Харин 20-ноос баруун аймгуудаар, 21-нд ихэнх нутгаар дахин дулаарах төлөв ажиглагдаж байна.

Нийслэл орчимд 17-нд хур тунадас орохгүй, өдөртөө +18…+20 градус дулаан байх ч ойрын өдрүүдэд салхи ширүүсч, сэрүүсэхийг мөн анхаарууллаа.