Цаг уурын байгууллагаас ойрын тав хоногийн цаг агаарын урьдчилсан төлөвийг танилцуулж, баруун болон говийн аймгуудын ихэнх нутгаар агаарын температур +35 хэмийг давж, Говь-Алтай, Баянхонгор аймгуудын өмнөд хэсгээр +40 хэмээс дээш хална гэдгийг анхаарууллаа.

Иймд малчид, иргэд, тээвэрчид халуунд удаан хугацаагаар байхгүй байх, наршилт болон халалтаас үүдэх эрсдэлээс урьдчилан сэргийлэхийг зөвлөж байна.

Өнөөдөр /06 дугаар сарын 30-наас 07 дугаар сарын 1-ний 20:00 цаг хүртэл/ ихэнх нутгаар солигдмол үүлтэй байх бөгөөд шөнөдөө Дорнод, Дарьгангын тал нутгийн зарим газраар, өдөртөө Монгол-Алтай, Хангай, Хөвсгөл, Хэнтийн уулархаг нутаг болон Дорнод-Дарьгангын тал нутгаар бороо орж, дуу цахилгаантай аадар бороо орох төлөвтэй байна.

Салхи ихэнх нутгаар баруунаас секундэд 5-10 метр байх бөгөөд борооны өмнө түр зуур ширүүснэ.

Агаарын температурын хувьд шөнөдөө уулархаг нутгаар +6...+11 хэм, бусад нутгаар +12...+27 хэм дулаан байх бол өдөртөө ихэнх нутгаар +28...+33 хэм хүрч хална. Харин Их нууруудын хотгор болон говийн бүсийн өмнөд хэсгээр +35...+40 хэм хүрэх төлөвтэй байна.

Улаанбаатар хотод багавтар үүлтэй, бороо орохгүй. Баруун хойноос секундэд 4-9 метрийн салхитай. Шөнөдөө +14...+16 хэм, өдөртөө +28...+30 хэм дулаан байна.

Ирэх тав хоногийн төлөв

Долдугаар сарын 2-6-ны хооронд уулархаг болон зүүн бүсийн нутгаар үе үе бороо орж, дуу цахилгаантай аадар бороо үргэлжилнэ. Тодруулбал, долдугаар сарын 2-нд Монгол-Алтай, Хангай, Хэнтийн уулархаг нутаг, Онон, Улз голын хөндий, Дорнод, Дарьгангын тал нутгаар, 3-нд төвийн аймгуудын ихэнх нутаг болон зүүн аймгуудын зарим хэсгээр, 4-5-нд Монгол-Алтай, Хангай, Хэнтийн уулархаг нутаг, Халх голын сав газраар бороо орох төлөвтэй байна.

Энэ хугацаанд салхи секундэд 5-10 метр байх боловч аадар борооны өмнө түр зуур ширүүсэх юм.

Харин агаарын температурын хувьд халуун хэвээр үргэлжилж, говийн бүс нутгийн өмнөд хэсгээр өдөртөө +37...+42 хэм хүрэх бол говийн хойд хэсгээр +31...+36 хэм, бусад нутгаар +25...+30 хэм дулаан байх төлөвтэй байгааг цаг уурчид мэдээллээ.