Амралтын өдрүүдээ дулаахан гэртээ дуртай амттанаа хийсэн шиг ая тухтай өнгөрөөх шиг жаргал хаа байхав. Өдөрт тутамд хэрэглэдэг дэлгүүрийн хуурай хүнснээс хаа нэг татгалзаж өөрийн гараар нарийн боов хийж, халуун кофетой хүртэх сайхан. Тиймээс эзэгтэй танд амтат тэргүүн боов хийх жорыг хүргэж байна.
Орц
Гурил1.5 кг
Масло - 1.5 кг
Давс - 25 г
Ус - 1л
Нимбэгний хүчил - 1 чимх
Өндөг - 1ш
Чихрийн ханд бэлтгэх:
Ус - 500г
Элсэн чихэр - 1.3 кг
Хийх аргачлал: Тэргүүн боовны зуурмагийг бэлтгэхдээ давстай бүлээн усандаа чимх нимбэгний хүчил хийж хутгана. Бас өндөг нэмж болно. Ингээд бэлтгэсэн зуурмагаараа шигшиж бэлтгэсэн гурилаа зуурна. Зуурсан гурил нэг их хатуу ч биш, нялцгай ч биш, дунд зэрэг байх ёстой. Зуурсан гурилаа эвэнд нь ортол сайтар нухаж тавиад чийгтэй алчуураар бүтээх буюу гурилын түмпэнгээр таглан 10-15 минут орчим амраана. Гурил амарч байх хооронд өмнө нь бэлтгэсэн цөцгийн тосоо царцаана.
Цөцгийн тосыг бэлтгэх : 1.5 кг цөцгийн тосоо гараараа бяцлан зөөлрүүлээд 100 г орчим хуурай гурилтай хольж базаад 1.5 см орчим зузаантайгаар хавтгайлан бэлтгэж зуурсан гурилаа амраах агшинд хөргөгчинд хийж 10-15 минут орчим байлган царцаана. Гурилаа голоос зах руугаа дарах маягаар голд нь зузаан, зах руу нь нимгэлж элдэнэ. Тэгээд голд нь царцааж бэлдсэн цөцгийн тосоо тавьж хуйлж бооно. Эхний элдсэн гурилаа хөргөгчинд 15-20 минут орчим байлгаж царцаана. Гарган авч элдээд 4 нугалан буцааж хөргөгчинд 15 минут орчим байлгана. Гурилаа дахин гарган авч түрүүчийн элдсэний эсрэг чиглэлд элдэн 6 нугалж дахин 10-15 минут орчим царцаана. Дахин гаргаж ирээд 1 см орчим зузаантайгаар элдэж өөрийн хүссэн хэмжээгээр жижигхэн хэрчиж хушуулж нугалсан алчуур хэлбэртэй болгон бага зэрэг норгосон төмөр тэвшинд тавьж 200-220 градус халсан шарах шүүгээнд хийн 15-20 минут шарж бэлэн болгоно. Бэлэн болсон тэргүүн боовон дээрээ бэлтгэсэн чихрийн хандаа түрхэнэ. Чихрийн хандыг бэлтгэхдээ усаа буцалгаад дээр нь элсэн чихрээ хийж хутган буцалгаад өтгөвтөр чихрийн ханд бэлэн болно. За ингээд тэргүүн боов маань бэлэн боллоо. Ёсоор нь зөв хийсэн бол салахын аргагүй сайхан амттай шүү. Тавтай зооглоорой.
