Хатан хаан II Елизавета өвлийн гол баярын өмнө зөвхөн ордонд ажиллаж буй хүмүүст л гэхэд 600 гаруй бэлэг бэлддэг байна. Зул сарын бэлэг тараах явц хатан хааны уламжлалын дагуу явагддаг бөгөөд ордны бүхий л ажилтнууд ёслолын танхимд цуглан, дугаарлан зогсдог гэнэ. Елизавета тэднийг тойрон явж, бүгдэд нь бэлгээ нэг бүрчлэн гардуулж өгдөг байна. Бэлгээ гардуулахдаа хүн бүрт хандан "Энэ жил таны үзүүлсэн туслалцаанд талархаж байна. Зул сарын мэнд!" хэмээн талархлаа илэрхийлэхийн дээр мэндчилгээ хүргэдэг аж. Тухайн өдөр аль нэг ажилтан эзгүй байвал түүн рүү бэлгийг нь шуудангаар илгээх бөгөөд бэлэгтэй хамт хатан хааны мэндчилгээ бүхий ил захидлыг илгээнэ. Хатан хааны бэлгэнд ихэвчлэн ном, аяга, шаазан, бэлгийн карт байх бөгөөд хайрцганд боосон зул сарын амттан байдаг гэнэ. Уг бэлэгт 30 мянга орчим фунт стерлинг буюу 100 гаруй сая төгрөг зарцуулдаг байна.
Мөн ордны ажилтнуудаас гадна хатан хааны оффис ордны шуудан, ордны цагдаагийн газрын ажилтнуудад зориулан 1500 хайрцаг амттан илгээж, 750 орчим ил захидлыг найз нөхөд, төрөл төрөгсөд, гадны улс орнуудын төрийн тэргүүнүүдэд нөхрийн хамт гараараа бичин илгээдэг гэнэ.
