Монгол Улсын төрийн нэрт зүтгэлтэн, тусгаар тогтнолын төлөө, Манжийн дарлалын эсрэг тууштай тэмцэгч, Богд хаант Монгол Улсыг үүсгэн байгуулагч гол удирдагчдын нэг, Монголын дипломат албыг үүсгэн байгуулагч бол Эрдэнэ дайчин чин ван Минжиддоржийн Ханддорж юм.
Бид энэ удаад Чин ван Ханддоржийн өргөөг уншигч та бүхэнд танилцуулж байна.
Товч түүх: Богд хаант Монгол Улсын үед Нийслэл хүрээнд баригдсан гоёмсог байшингийн нэг нь Чин ван Ханддоржийн өргөө юм. Түүний өргөөг хүрээнийхэн “Дайчин вангийн өндөр” гэж нэрлэдэг байв. Энэ байшинг 1913 онд Богд хаант Монгол Улсын гадаад хэргийн тэргүүн сайд Чин ван Ханддорж сууцандаа зориулан бариулж, 1915 онд насан эцэслэтлээ амьдарч байжээ. Ардын засгийн эхний жилүүдэд хичээнгүй сайд Б.Цэрэндорж сууж байсан байна. 1923 онд уг байшинг Судар бичгийн хүрээлэнд шилжүүлжээ.
Чин ван Ханддоржийн байшин нь монголын орон сууцны барилгын нэгэн чухал дурсгал бөгөөд төлөвлөлт, чимэглэлийн хувьд сүм дуганы барилгаас ялгаатай. 7,5 м х 16,0 метрийн хэмжээтэй, тоосго, модон хана, модон дээвэртэй, сууцны зориулалттай хоёр давхар барилга юм. Уг байшингийн нэгдүгээр давхар нь тоосгон ханатай өвөл суухад зориулагдсан, хоёрдугаар давхар нь эргэн тойрон цонхтой гонхон маягийн бөгөөд зун суухад зориулагджээ. Өдгөө тус байшинд Монгол Улсын Гадаад харилцаа, дипломат албаны түүхийн музей байрлаж байна.
Хамгаалалтын зэрэглэл: БНМАУ-ын СнЗ-ын 1961 оны 524 дүгээр тогтоолоор улсын хамгаалалтад авсан.
Байршил: Сүхбаатар дүүргийн 2 дугаар хороо, Сөүлийн гудамж, Нацагдоржийн нэрэмжит Улаанбаатар хотын нийтийн төв номын сангийн зүүн хэсэгт байдаг.
