Замын хөдөлгөөнд оролцож буй жолооч нар техникийн бүрэн бүтэн байдал хангаагүй тээврийн хэрэгсэлтэй замын хөдөлгөөнд оролцсоноос мөн өөрийн болгоомж сэрэмжгүйгээс үүдэн зам тээврийн осолд өртсөөр байна.
Ѳчигдѳр буюу 2020 оны 4 сарын 27 ны өдөр Орхон аймагт 4 настай хүүхдийг хашаан дотор мѳргѳж амь нас нь хохироосон хэрэг гарсан бол Говьсүмбэр аймагт 2 автомашин мѳргѳлдсѳний улмаас 1 машинд зорчиж байсан 4 хүн машинтайгаа шатаж нас барсан хэргүүд гарсан байна. Хэргийг тодруулбал : Говьсүмбэр аймгийн Шивээговь сумын 2 дугаар багийн “Өехий” гэдэг газар /аймгийн төвөөс урд зүгт 20 км-т/ Улаанбаатар хотоос Дорноговь аймгийн Сайншанд сумын чиглэлд 1 зорчигчтой зорчиж явсан иргэн Б-ийн эзэмшлийн “Маяти-2” загварын ачааны автомашины араас иргэн О-ын эзэмшлийн 4 зорчигчтой “Бонго жи-2” загварын бага оврын ачааны автомашин мөргөсний улмаас шатаж байна гэсэн дуудлагыг 2020 оны 04 сарын 27-ны өдрийн 22:13 цагт өгчээ. Тус аймгийн Онцгой байдлын газрын Гал түймэр унтраах, аврах 37 дугаар ангийн алба хаагчид 20 км замыг туулан 22:28 цагт очиж, 5 минут ажиллаж галыг унтраажээ. Уг гал түймэрт иргэн О/36 настай, эрэгтэй/, Г /37 настай, эрэгтэй/, О /38 настай, эрэгтэй/, М /40 настай, эрэгтэй/ нар автомашины төмөр эд ангид хавчуулагдан гал түймэрт өртөж нас барсан байжээ.
