Олон улсын шатрын холбооноос 2024 оны 12-р сарын 26-31-ний өдрүүдэд АНУ-ын Нью-Йорк хотноо түргэн болон түргэвчилсэн тоглолтын Дэлхийн аварга шалгаруулах тэмцээн зохион байгуулагдаж шинэ оны босгон дээр хөшгөө хаав. Тус тэмцээнд 63 орны 300 элит шилдэг шатарчид оюун ухаанаа сорин өрсөлдсөн бөгөөд Үндэсний шигшээ багийн тамирчин, эИМ Т.Мөнхзул эмэгтэй ангиллын түргэн тоглолтын төрөлд 13 дугаар байрт эрэмбэлэгдлээ.
Энэ жилийн хувьд тус тэмцээний түргэвчилсэн тоглолтын төрөл сонгон шалгаруулалт, хасагдах шатны тэмцээн гэсэн үе шатуудтай зохион байгуулагдаж байгаа гэдгээрээ онцлогтой байв. Ташрамд дурдахад 2023 онд зохион байгуулагдсан тус Дэлхийн аварга шалгаруулах тэмцээний түргэвчилсэн төрөлд эИМ Т.Мөнхзул шагналт 4-р дүгээр байр эзэлсэн түүхэн амжилтаараа МШХ-ны Алтан бэрс тэргүүн дээд шагнал гардуулах ёслолын Шилдгийн шилдэг шатарчнаар шалгарсан юм.
