Холливудын авьяаслаг жүжигчин Кристен Стюарт Диана гүнж, Чарльз хунтайж нарын салалтыг өгүүлэх шинэ кинонд дүр бүтээхээр болжээ.
Холливудын мэдээллийн сайтад бичсэнээр 1990-ээд оны эхэн үеийг харуулах энэ киноны зохиолыг Стивен Найт бичиж, гол дүрд буюу Диана гүнжийн дүрд Кристен Стюарт тоглох аж. Найруулагч Пабло Ларрайны өгүүлснээр киноны үйл явдал Сандрингем тосгонд Диана гүнж бүтэлгүй гэрлэлтээсээ болж хэрхэн шаналж байгаа талаар өгүүлэх гэнэ.
“Энэ кино бол Чарльз хунтайжтай учрахаасаа өмнө ямар эмэгтэй байсан, буцаад тийм эмэгтэй болохыг хүсч, шийдэж буй эмэгтэйн түүх” хэмээн Ларрайн ярьжээ.
Диана Спенсер 1981 онд Чарльз хунтайжтай гэрлэж, 1992 онд салж, 1996 онд гэрлэлтээ цуцлуулсан юм. Улмаар дараа жил нь авто ослоор нас баржээ.
