Боловсрол, шинжлэх ухааны яамны харьяа “Инженер, технологийн дээд боловсрол” төслийн дэмжлэгээр Япон Улсад суралцах болзол хангасан Коосэн хөтөлбөрийн 34, Бакалаврын хамтарсан хөтөлбөрийн 16 буюу нийт 50 оюутанд батламж гардууллаа.
Болзол хангасан оюутнууд жил бүрийн дөрөвдүгээр сараас эхлэн тус улсад суралцдаг уламжлалтай. Энэ оны хувьд дэлхий нийтэд тархаад буй цар тахалтай холбоотой тогтоосон хөл хорионы улмаас оюутнуудын Япон Улс руу явах хугацаа хойшлогдож, дөрөвдүгээр сараас эхлэн өнөөг хүртэл цахимаар хичээллэж байв. Тэд Монгол Улсын Онцгой байдлын комиссын шийдвэрийн дагуу 2020 оны аравдугаар сарын 10-ны өдрийн тусгай үүргийн нислэгээр арлын орныг зорих юм.
Батламж гардуулах ёслолд Боловсрол, шинжлэх ухааны дэд сайд Г.Ганбаяр, ЖАЙКА-гийн Монгол дахь төлөөлөгчийн газрын дарга Тамура Эрико, Шинжлэх Ухаан Технологийн их сургуулийн захирал, удирдлагууд болон эцэг, эхийн төлөөлөл оролцож, оюутнууддаа баяр хүргэж, амжилт хүслээ.
“Инженер, технологийн дээд боловсрол” төсөл нь Монгол Улсад өндөр мэдлэг, ур чадвар бүхий инженер, технологийн мэргэжилтэн бэлтгэх, өрсөлдөх чадварыг нэмэгдүүлэх, боловсон хүчний нөөцийг бэхжүүлэх, сургалтын орчин, чанарыг шинэчлэн сайжруулах зорилготой. Энэ хүрээнд сургалт, судалгааны үйл ажиллагааг 2014 оноос эхлэн хэрэгжүүлж өдгөө зургаа дахь жилдээ үргэлжлүүлж байна. Өнөөдөр батламж гардан авсан 50 оюутан бүгд инженерийн чиглэлээр 2-2,5 жил суралцаж төгсөөд эх орондоо эргэн ирж мэргэжлээрээ 5 жил ажиллах болзолтойгоор Япон Улсыг зорьж байгаа юм.
2020 оны эхний хагас жилийн байдлаар нийт 670 оюутан, судлаач багш нар төслийн хөтөлбөрүүдэд хамрагдсан байна.
Эх сурвалж: БШУЯ
