Хоёр долоо хоногийн турш үргэлжилсэн цахим гүйлтэд нийт 25895 иргэн оролцож 466839км зам туулжээ. Энэ нь дэлхийг 11.6 удаа тойрох мөн дэлхийгээс сар луу ирж, очих зай юм.
Говь-Алтай аймаг 2021.03.28-ны өдрийн 00:00 цагийн байдлаар 86645км зам туулж хамгийн олон км туулсан аймаг, дүүргийн группийг хошуучиллаа.
Мөн дангаараа нэг өдөрт 25491км зам туулж цахим гүйлтийн аяны рекордыг шинэчилсэн юм.
Түүнчлэн Говь-Алтай аймаг нь нийт 3825 иргэнээ цахим гүйлтэд хамруулж, хамгийн олон оролцогчтой аймгаар шалгарлаа.
Нийслэлээс Сонгинохайрхан дүүрэг 47849км зам туулсан амжилтаараа тэргүүллээ хадгалж чадлаа. Чингэлтэй, Хан-Уул, Баянзүрх дүүргүүдийн туулсан зам тун ойролцоо байж, ширүүн өрсөлдөөн үзүүлж чадсан.
Улс орон даяар анх удаа зохион байгуулагдсан "Эрүүл мэндийн цахим гүйлт-2021" үйл ажиллагаанд ородцогчдын тоо 26000 болон өргөжлөө. Бүс бүсээр нэгтгэсэн дүнг удахгүй зарлана.
Эх сурвалж: Биеийн тамир, спортын улсын хороо
