“Мюнхен-1972”, “Монреаль-1976” олимпийн наадам, “Тегеран-1973” ДАШТ-ий алтан медальт, ОХУ-ын нэрт бөх Иван Ярыгиний нэрэмжит Гранпри тэмцээн тавдугаар сарын 27-30-нд Красноярск хотод болно. “Бага Дэлхийн аварга”гэгддэг тус тэмцээнд Монголын бөхчүүд 1991 онд анх хүч үзсэнээс хойш тасралтгүй оролцож ирсэн XXXII удаагийн тэмцээнд ДАШТ-ий нэг мөнгө, гурван хүрэл медальт, гавьяат тамирчин О.Насанбурмаа, ДАШТ-ий хошой хүрэл медальт ОУХМ Б.Шоовдор, Азийн аварга ОУХМ З.Болортунгалаг, Азийн АШТ-ий мөнгө, хүрэл медальт ОУХМ Э.Даваачимэг, 23 хүртэлх насны ДАШТ-ий хүрэл медальт ОУХМ Э.Гантуяа гээд туршлагатай мастеруудаас гадна Монголын чөлөөт бөхийн залгамж халаа болсон залуу тамирчдаар бүрдүүлсэн 20 гаруй хүний бүрэлдэхүүнтэй баг Красноярскийг зориод байна. Манай тамирчид Дархан-Уул аймаг, “Хасу-Мегастарс” клубийн дасгалжуулагч, спортын мастер Ё.Батдарханы удирдлага дор хүч үзэх бол шүүгчээр олон улсын шүүгч ОУХМ Х.Ганболд, Г.Амархүү нар ажиллана. Ямартаа ч цар тахалтай энэхүү хүнд үед хойд хөршийн хил давж Красноярскийн зорьсон бөхчүүдээ амжилт хүсье.
КРАСНОЯРСКТ ЗОДОГЛОХ МОНГОЛЫН БӨХЧҮҮД
Эрэгтэйчүүдийн 57 кг: Пүрвээгийн Дашцэрэн
61 кг: Намсрайн Ганбаяр
65 кг: Эрдэнэбатын Төгсжаргал
74 кг: Дарханбаярын Тэнгис, Олонбаярын Сүлдхүү
79 кг: Алтанзулын Дөлгөөн
86 кг: Мэндбилэгийн Тэмүүжин
92 кг: Дагвадоржийн Оргилох
Эмэгтэйчүүдийн 50 кг: Долгоржавын Отгонжаргал, Батбаатарын Энхзул
53 кг: Батхуягийн Хулан
55 кг: Баяраагийн Халиунаа, Батцоожийн Марал
57 кг: Эрхэмбаярын Даваачимэг
59 кг: Баатаржавын Шоовдор
62 кг: Энхбатын Гантуяа
65 кг: Зоригтын Болортунгалаг
68 кг: Очирбатын Насанбурмаа
72 кг: Энх-Амарын Даваанасан, Доржсүрэнгийн Цогзолмаа
