Зүрхний стрессийн эхокардиографийн шинжилгээ дасгалын болон эмийн ачаалалтай гэж хоёр төрөл байдаг. Энэ хоёр шинжилгээ аль аль нь дасгал хийлгэх эсвэл добутамин эмээр зүрхэнд стресс үүсгэснээр тайван байдалд ажиглагддаггүй зүрхний булчингийн хөдөлгөөн, цусны урсгалын өөрчлөлтийг шалгадаг шинжилгээний аргууд юм.
Добутамин эмийн бодисоор зүрхэнд ачаалал үүсгэн, аортын нарийсал, болон зүрхний булчингийн цус хомсролын хүндрэлийн зэргийг үнэлдэг ба добутамин нь зүрхний булчингийн эсэд нөлөөлж, агшилтын хүчийг нэмэгдүүлж, улмаар зүрхний цохилт, цусны даралтыг нэмэгдүүлэх үйлчилгээтэй.
Ялангуяа зүрхний үйл ажиллагаа буурсан гол судасны нарийсалын үед ердийн зүрхний эхокардиографийн шинжилгээгээр өвчний хүндийн зэргийг нарийн тодорхойлох боломжгүй байдаг бол добутаминыг ашиглан гол судасны нарийсалыг илүү нарийвчлалтай оношлох боломжийг бүрдүүлдэг.
2022 оны 05 сарын 05-ны өдөр тус эмнэлгийн зүрх судлал, зүрхний шигдээсийн эмч, сувилагч мэргэжилтнүүд Люксембургийн Их Гүнт улсаас уригдан ирсэн ЗОЧИН ПРОФЕССОРЫН БАГ-ийхантай хамтран добутамин эмтэй стресс ЭХО шинжилгээг тус эмнэлэг дээр анхны тохиолдлуудыг амжилттай хийлээ.
Тус шинжилгээнд зүрхний хуучин шигдээстэй, тэлэгч стент тавих боломжгүй, зүрхний ердийн ЭХО-д зүүн титмийн артерийн зоноор ханын хөдөлгөөн буурсан, тус эмнэлэгт зүрхний титэм судас залгах мэс засал (CABG) эмчилгээнд орохоор төлөвлөгдсөн хоёр эмчлүүлэгчид эмчилгээний тактик сонгох, эмчилгээний гарах үр дүн үнэлэх зорилгоор добутамин эмтэй стресс эхо оношилгоог амжилттай хийсэн бөгөөд шинжилгээний дүнд мэс засал хийх эсэх шийдвэр, мэс заслын дараах эмчилгээний үр дүнг таамаглахад чухал ач холбогдолтой мэдээллүүдийг олж авч чадлаа.
