YouTube-ийн бүтээгдэхүүн хариуцсан захирал Нейл Моханы мэдээлснээр тухайлбал Оросын эхлүүлсэн Украиныг эзлэн түрэмгийлэх дайныг "чөлөөлөх даалгавар" гэж нэрлэсэн бичлэгүүдийг платформоос устгасан. Хоёрдугаар сард дайн эхэлснээс хойш YouTube дээр Кремлийг сурталчилсан Владимир Соловьевын суваг зэрэг хэд хэдэн сувгийг хаасан. Мөн ОХУ-ын Батлан хамгаалах болон Гадаад хэргийн яамдтай холбоотой сувгууд сүүлийн саруудад дайныг "чөлөөлөх даалгавар" гэж тодорхойлсон шалтгаанаар видео бичлэг байршуулах эрхийг нь түр зогсоожээ.
Нейл Мохан хэлэхдээ YouTube компани Холокостыг үгүйсгэх зэрэг томоохон хүчирхийллийн үйл явдлын тухай бодлого баримталдаг гэж тайлбарлажээ. "Мэдээж Украинд болж байгаа үйл явдал бол хүчирхийллийн томоохон үйл явдал. Тиймээс бид энэ бодлогоо ашиглан урьд өмнө хэзээ ч авч байгаагүй арга хэмжээг авсан" гэж хэлжээ.
Мохан хэлэхдээ, YouTube дээрх дайны мэдээний контентыг зөвхөн Украинд л гэхэд 40 сая гаруй хүн үзсэн байна. "Эхний бөгөөд магадгүй хамгийн чухал үүрэг бол энэ үйл явдлын талаар мэдээлэл хайж буй хүмүүс YouTube-ээс үнэн зөв, найдвартай мэдээлэл авах боломжтой эсэхийг шалгах явдал юм" гэж компанийн төлөөлөгч нэмж хэлэв.
Устгагдсан контентуудын ихэнх нь зэвсэгт халдлагын тухай Кремлийн зохиолууд байна гэж Мохан хэлжээ.
YouTube нь Орос улсад 90 сая орчим хэрэглэгчтэй боловч тус улсад платформ дээр зар сурталчилгаа байршуулахыг хориглосон байгаа юм. Мөн энэхүү платформ нь Оросын төрийн мэдээллийн хэрэгсэл, тэр дундаа Russia Today, Sputnik зэрэг сувгуудыг дэлхий даяар хориглосон.
Эх сурвалж: The Guardian
