Киевийн Соломенскийн дүүргийн шүүхээс Сумы мужийн 62 настай иргэн Александр Шелиповын амийг хөнөөсөн хэргээр 21 настай Оросын цэрэг Вадим Шишимаринд бүх насаар нь хорих ял оноолоо. Шүүх хурлыг Украины шүүхийн YouTube сувгаар шууд дамжуулан үзүүлжээ. Шишимарин - Москва мужийн Кантемировская дивизийн 4-р танкийн командлагч. Прокурорын төлөөлөгч өмнө нь Оросын цэргийнхнийг Украины Эрүүгийн хуулийн 438 дугаар зүйлийн 2 дахь хэсэгт ("Дайны хууль, ёс заншлыг зөрчсөн") буруутай гэж үзэж, түүнд ялын дээд хэмжээ буюу бүх насаар нь хорих ял оноохыг хүсэж байсан. Энэ нь 2022 оны 2-р сарын 24-нд Оросууд Украин руу довтолж эхэлснээс хойших дайны гэмт хэрэгт холбоотой анхны шүүх хурал болж байна.
Шүүгч Шишимарины тодорхойлолтыг уншиж, түүнийг мөнгө олохын тулд Оросын армид гэрээгээр алба хааж байсан, түүний цалин 500 орчим доллар байсан гэж дурджээ. Хүн амины хэргийн газарт дөрвөн гэрчийн оролцоотойгоор шүүх эмнэлгийн туршилт хийсэн гэдгийг хэллээ. Шүүх хүн амины хэргийг санаатайгаар үйлдсэн гэж дүгнэсэн байна.
Орос цэргийн Шелиповыг хөнөөх санаа байгаагүй гэсэн шүүгдэгч болон өмгөөлөгчийн мэдүүлгийг шүүх няцаасан. Шишимаринд буудах тушаал өгөхөд тэр татгалзсан бол түүнд юу ч заналхийлж байгаагүй, эсвэл буудаад алдсан мэт дүр эсгэж болох байсан бөгөөд шүүх хурал дээр яллагдагчийн биеэ авч яваа байдал нь Шишимарин үйлдлийнхээ үр дагаврыг ойлгож байсныг харуулж байна гэж шүүхээс мэдэгджээ.
Шүүх хуралд Вадим Шишимарин мэдүүлэг өгч, яагаад зэвсэггүй хүнийг буудсанаа тайлбарлахдаа: “Нэг хүн явж байсан, утсаар ярьж байсан. Прапорщик Макеев буудах тушаал өгсөн. Би татгалзсан. Дараа нь өөр нэг цэргийн хүн заналхийлсэн хоолойгоор биднийг барьж өгнө гэж сүрдүүлж, буудахыг тушаасан. Би богино хугацаанд буудсан" гэж тэрээр хэлжээ. Мөн "Би түүнийг алахыг хүсээгүй. Намайг тайван орхиосой гэсэндээ буудсан" гэж хариулжээ.
Хохирогчийн бэлэвсэн эхнэр Катерина Шелиповагийн мэдүүлэгтээ: “Тэр өдөр би гэртээ байсан (нөхөр нь гэрээс холгүй нас барсан) буун дууг сонсоод хашаандаа гараад үүдэнд очиход машин дотор буу барьсан Шишимарин байхыг харсан.
"Би хашааны хаалгаа хаагаад зогссон. Буудлага дуусмагц би гадаа гараад нөхрөө олж харахад тэр аль хэдийн толгой руугаа буудуулсан байсан. Би хашхирч эхэлсэн, маш чанга хашхирсан. Хөршүүд ирж бид түүнийг даавуугаар бүтээсэн" гэж хэлжээ.
Хохирогч эмэгтэй Оросын цэрэгт бүх насаар нь ял эдлүүлэхийг хүсэж байгаагаа хэлсэн. "Гэхдээ түүнийг манай Азовсталийн хамгаалагчдаар солилцох юм бол би эсэргүүцэхгүй" гэж эмэгтэй нэмж хэлжээ.
Шишимаринаас гадна яллагдагчтай хамт бууж өгсөн жирийн цэрэг Иван Малтисовыг шүүхэд байцаажээ. Малтисов нэг машинд сууж, юу болж байгааг нүдээр харсан байна.
Эх сурвалж: Настоящее время
