Унгарын Ерөнхий сайд Виктор Орбан Украины дайнтай холбогдуулан тус улсад онц байдал зарласан тухай Bloomberg мэдээллээ.
Орбаны хэлснээр, энэ арга хэмжээ нь Украинд болж буй үйл явдлын үр дагаврын эсрэг "маневр хийх орон зай, яаралтай хариу арга хэмжээ авах боломжийг" тус улсын засгийн газарт олгоно гэжээ.
“Дайн болон Брюсселийн хориг арга хэмжээ нь эдийн засгийн асар их цочрол, үнийн огцом өсөлтөд хүргэсэн гэж бид харж байна. Дэлхий нийт эдийн засгийн хямралын ирмэг дээр байна. Засгийн газар үндсэн хуулиар олгогдсон эрхээ эдэлж, шөнө дундаас (5-р сарын 25) эхлэн онц байдал зарлаж байна" хэмээн Ерөнхий сайд хэлээд Украин дахь дайн Унгарын эрчим хүч, санхүүгийн аюулгүй байдалд заналхийлж байгааг тэмдэглэлээ.
Унгарын засгийн газар онц байдлын анхны арга хэмжээг лхагва гарагт зарлах төлөвтэй байна. Унгар улс Европын холбооны Оросын эсрэг хориг арга хэмжээний зургаа дахь багцын нэг хэсэг гэж үзэж байгаа Оросын нефтийн импортод хориг тавихыг эсэргүүцэж байна. Тус улсын төлөөлөгчид энэхүү хориг нь эдийн засагт их хэмжээний хохирол учруулна гэж үзэж байна.
Европын холбоо нь Унгар болон бусад хэд хэдэн оронд Оросын газрын тосноос татгалзсаны зардлыг нөхөн төлнө гэж таамаглаж байна. Унгарын Ерөнхий сайд Брюссель Будапештэд санхүүгийн тусламж үзүүлэх талаар дэлгэрэнгүй мэдээлэл өгөх хүртэл тус улс газрын тосны хоригийг дэмжихгүй гэдгээ мэдэгджээ.
Эх сурвалж: Медуза
